132 ngut ki kyrtong kiba la pass tang Klas 8 haduh Klas 12, 186 ngut ki ‘Crorepati’ ba ïakhun ilekshon MLA, bun tam na ka NPP

Shillong, Rymphang 18:

Ha ka jingpeit bniah ïa ki kot ki sla jong ki 375 ngut ki kyrtong ki ban ïakhun ïa ka ilekshon sha ka ïingdorbar thawaiñ ka jylla ka ban long ha ka 27 tarik mynta u bnai, ka Association for Democratic Reforms (ADR) ka la pyntip ba ha kane ka kynti, ki don haduh 186 ngut kita ki kyrtong kiba dei ki ‘crorepati’ lane kiba ka spah ka phew ka long T.1 klur tam.

       Ha ka ilekshon kaba la long ha u 2018, ka ADR ka la ong ba na ki 370 ngut ki kyrtong, 152 ngut ki dei ki crorepati.

       Haba peit ïa ki seng saiñ pyrthei, ka ADR ka la ong ba na ki 57 ngut ki kyrtong ba pynïeng da ka NPP haduh 43 ngut ki dei ki crorepati.

       Na ki 46 ngut ki kyrtong ka UDP, 30 ngut ki dei kita ki crorepati, na ka All India Trinamool Congress 27 na ka 56 ngut ki dei ki crorepati, 25 na ka 60 ngut ki kyrtong ka Congress ki dei ki Crorepati, katba na ka BJP, 23 na ka 60 ngut ki dei ki Crorepati.

       Kiwei pat ki seng saiñ pyrthei kiba don ki kyrtong kiba dei ki crorepati ki kynthup ïa uwei na ka Gana Suraksha Party, 8 ngut na ka HSPDP, uwei na ka Republican Party of India, 7 ngut na ka Voice of the People Party lane VPP, 17 ngut ki kyrtong khlem seng, lai ngut na ka PDF bad uwei na ka Republican Party of India (A).

       Nalorkata, ka ADR ka la batai ba ki kyrtong kiba ka jingdon jingem bad ka spah ka phew kaba kot 5 klur tyngka shaneng ki don 85 ngut na ki 375 ngut. Kiba don hapdeng 2 klur haduh 5 klur tyngka ki don 47 ngut, katba ki don 103 ngut ki kyrtong kiba ka spah ka phew ka long hapdeng 50 lak haduh 2 klur tyngka. Kiba ka jingdon jingem hapdeng 10 lak haduh 50 lak tyngka, ki kyrtong ki don 76 ngut katba ki don 64 ngut ki kyrtong kiba ka spah ka phew ka duna ïa ka 10 lak tyngka.

       Ha kawei pat ka liang, na ki 375 ngut ki kyrtong kiba ïakhun ïa ka ilekshon sha ka ïingdorbar thawaiñ ka jylla, ka Association for Democratic Reforms kaba la peit bniah ïa ki kot ki sla jong ki kyrtong ka shem ba haduh 132 ngut ki dei kiba la pyndep tang ïa ka Klas 8 haduh Klas 12.

       Nalorkata, 235 ngut ki kyrtong ki la pyntip ba ki la pyndep ïa ka Graduation bad shaneng, 7 ngut kiba don ïa ka Diploma katba uwei u la pyntip ba u dei tang uba shu nang ban thoh bad pule lane uta u Literate.

       Ha kaba ïadei bad ka rta jong ki nongïakhun, 134 ngut ki dei kiba don hapdeng 25 haduh 40 snem ka rta, 215 ngut kiba hapdeng 41 haduh 60 snem ka rta katba 26 ngut ki dei kiba hapdeng 61 haduh 80 snem ka rta.

       Nalor kata, ki don 36 ngut ki kynthei kiba ïakhun ha kane ka ilekshon haba ïanujor bad ki 33 ngut kiba la ïakhun ha ka ilekshon MLA 2018.