Rymphang:
Sa tang khyndiat sngi, ki paidbah ka Jylla kin ïoh ïa ka lad ban pyndep ïa la kajong ka kamram ban leit thep vote kum ki nongshong shnong na ka bynta ban jied ïa la ki jong ki kyrtong bad ki seng saiñ pyrthei kiba ki sngew dei, kata, ha ka 27 tarik, Rymphang, 2023. Ka Election Commission ka ri India ka la buhthong ba ka jingthep vote ka dei ban long kaba khuid bad kaba ïaid beit ïaid ryntih hapdeng ka shongsuk shongshngaiñ. Ka la don ruh ka jingpynkhreh ban pynkhlaiñ ka jingpahara ha baroh ki jaka thep vote bad yn kham pynkhlaiñ shuh shuh ha ki jaka thep vote kiba don jingma bad kham jur shuh shuh ka jingma.
Hynrei, ha kine ki khyndiat sngi naduh ba la kham shongshit ka jingïalap ilekshon, la mih sa ki jingjia kiba la wanrah ka jingshong syier ïa ki nongshong shnong. Ki la don ki jingjia ha kine ki sngi kiba ïadei bad ka jingïakynad ilekshon kiba la jia kum ha Phulbari konstitwensi kaba hap ha West Garo Hills district, bad ha West Shillong konstitwensi, ka konstitwensi kaba ha nongbah Shillong. Ka jingshim kabu ki runar ban pynthut bad pynshong syier ïa ki paidbah ka kham jia bha ha kiwei pat ki Jylla lyngba ka jingkyrshan jongno-re-jongno na lyndet. Lehse, ka dei ka sien banyngkong ba ka jinglong jingman tang namar ka ilekshon ka la poi shaduh u pud ba ki bor pynïaid ilekshon ha Meghalaya ki la hap ban wanrah noh da ki shipai ban phah ïaid pahara khnang ban wanrah biang ka jingshngaiñ hapdeng ki nongshong shnong khnang ba ki runar kiba pyrshang ban thombor ïano-ïano kin shynraiñ.
Ka jingïakynad ilekshon ka ju jia ha kaba ju poi shaduh u pud ban ïashoh ïadat, bad pynïap para briew. Kum kine ki jingjia ki dei ki jingleh riewkhlaw ha kaba ki paidbah babun balang da lei lei kim lah ban pdiang, bad ki bor ba dei khmih ki hap ban pyntikna ba ki runar kim ïohlad ban leh ki kam thombor bad pyntriem. Ki nongshong shnong ki don ïa ka hok ïano ki kwah ban kyrshan haba wan ka ilekshon ban jied ïa ki dkhot ka Ïingdorbar Thawaiñ ka Jylla ne Parliament, hynrei ban pynbor ïa ki paidbah ban kyrshan ïano-ïano da kaba byrngem byrsit, ka jingmut jong ka synshar paidbah ka la ïap lypa.
Ha Jylla Tripura, ki paidbah ki dang shu dep shen ban thep vote ha ka 16 tarik mynta u Rymphang, 2023, na ka bynta ban jied ïa ki dkhot ka Ïingdorbar Thawaiñ kumba long ha Meghalaya. Ki la jia ki jingïakynad ilekshon ha ka sngi thep vote ha ki katto katne ki konstitwensi, bad ki jingjia ki bteng wat hadien ka jingthep vote. Ki la don palat 100 ngut ki briew kiba la mynsaw ha Tripura namar ki jingjia ïakynad ilekshon kiba la jia hadien ka jingthep vote, ha kaba ym duna ïa ka 8 ngut haduh 10 ngut ki don kiba mynsaw ha man la ki district.
Ka Jylla Meghalaya kam dei ka Jylla kaba ki paidbah ki thrang ïa ka jingumsnam, naduh ki nongïakhun ïa ka ilekshon bad ki paidbah nongjied. Ki paidbah ki kwah ïa ka suk ka saiñ bad kim khmih lynti ba ki kyrtong kiba ïakhun ïa ka ilekshon kin long ki nongpynshit bad nongthaw jingkulmar tang ban jop ilekshon. Ki kyrtong kiba ïakhun ilekshon ki dei ban lah ban tehlakam ïa la ki jong ki nongkyrshan, ym ban khmih lynti ban jop ïa ka ilekshon da kaba shu thombor bad byrngem byrsit. Ka kyiad, ka pisa bad kiwei kiwei ki jingthong, ki dei kiba sniew ha kaba ki don ki kyrtong kiba pyndonkam ban phah byrngem bad thombor ïa ki briew ki bym kyrshan ïa ki. Kane ka dei ka juk ha kaba ki paidbah nongjied ki la lah ban ïohi lut lada leh bakla da ki kyrtong kiba ïakhun ilekshon lyngba ka jingdon ki kor ki bor. Ka jingjia kaba jia sha kiwei pat ki Jylla bad ki Ri ha pyrthei, la lah ban pynsaphriang tang hapdeng khyndiat sekon ne minit. Namarkata, ki runar kim lah ban phetrieh na ki kor ki bor, kum ki mobile phone, kor ringdur (CCTV) ba la pyndait ha kylleng ki jaka, bad kine ki la ïarap shisha ïa ki nongtohkit ban lapksai ïa ki runar kiba donkti. Ki briew ka aiñ ki dei ban leh da kaba tyngeh ïa kino-kino kiba pynshit ban thaw jingkulmar ha kane ka ilekshon, namar ka jingshngaiñ jong ki nongshong shnong ka dei ka jingjop ka synshar paidbah lyngba ka jingthep vote kaba lait na kino-kino ki jingpynwit.
