Shillong, Rymphang 19:
Ki pulit ha ka 17 tarik mynta u bnai ki la ïoh pdiang ïa ka ejahar na u Branch Manager, SBI, Pynursla Branch ba uwei na ki nongtrei jong ki u la rong noh ïa ka pisa kaba T.95 lak na kane ka jaka kynshew pisa ha ka 13 tarik mynta u bnai.
Haba ïadei bad kane, la bynshet kam ha u SDPO, Sadar bad ka kynhun jong u ban tohkit bad wad ïa utei u briew.
Na ka liang jong ka kynhun ka la ïaid shakhmat bad ka jingtohkit bad la wad ruh ïa utei u briew ha ryngkat ka jingïarap ki bahaïing hasem jong u lem bad ki nongtrei jong katei ka jaka kynshew pisa.
Kumta ha ka 19 tarik mynta u bnai, utei u briew u la shah bat noh ha u SDPO, Sadar bad ka Special Cell bad hadien kane, la kem noh ïa u.
Ka jingtohkit halor kane ka dang ïaid shaphrang ban pyntikna ïa katei ka jingjia bad ka pisa ïa kaba u la ïoh ban rong.
“Katkum ka jingtohkit, u la pyndonkam bakla ïa ka ‘password’ ba la ai sha u halor ka jingshaniah da uwei u pat u nongtrei (kaba long pyrshah) na bynta katto-katne bnai ban tuh ïa ka pisa bad kumba ka long, u la pynlut ïa ka pisa ha ki kam khalai lyngba ka ‘online’,” la ong ka kyrwoh na u Dr. M.G.R. Kumar, IPS, Sr. Superintendent of Police, East Khasi Hills.
