Shillong, Rymphang 19:
U President rangbah ka United Democratic Party (UDP), Bah Metbah Lyngdoh u la ong ba ki seng ri-thor kiba wan sha ka Jylla ki pynbiej ïa ki paidbah nongshong shnong ha ka kyrteng jong ka roi ka par.
U Bah Lyngdoh u la ong ïa katei haba ai jingkren ha ka jingïalang jong ka UDP, Mairang Circle kaba la long ha ka Sngi Saitjaiñ ha u Mot Tirot, Mairang.
Haba pynsngew ïa ka jingsheptieng jong u ïa ki seng ri-thor, u la ong ba kine ki seng ki wan ban pynbiej ïa ki paidbah ha ka kyrteng jong ka roi ka par, hynrei kim ong eiei shaphang ki lad jingïada ban pynneh pynsah ïa ka jinglong rit paid jong ki.
“Ka ilekshon 2023 ka dei ka ilekshon kaba pher bha. Nga sheptieng ba ïoh ki paidbah ki shah ïalam bakla…kata ka dei na ka jingwan jong ki seng kiba pynbiej mynta ïa ki paidbah ha ka kyrteng ka roi ka par, hynrei ym ban don ïa ka jingmut ban ïada ïa ka jaidbynriew rit paid,” la ong u Bah Lyngdoh sha u paidbah ba bun balang uba la wan poi ha katei ka jingïalang.
U la ong ba ka UDP ka ïeng ha ka nongrim ban ïada ïa ka jaidbynriew katba kiwei pat ki seng kiba ïakhun ïa ka ilekshon khamtam kito kiba na shabar ka Jylla ki thmu ban ñiom ha ka kyrteng jong ka roi ka par.
U Bah Lyngdoh uba long ruh u kyrtong ka UDP na Mairang u la phla sha ki paidbah ba ha ki por ba la dep, ki la don bun ki seng heh ka ri ne ki seng na sha ri-thor kiba la pynbiej ba un pynïasoh noh bad ki, hynrei u la kyntait ïa ka jingtyrwa bad rai ban ïaineh ha kawei ka seng bad ka nongrim jong ka, kata ban ïakhun bad ïada ïa la ka jong ka jaidbynriew.
Nalor kane, u la ong ba ki paidbah kim dei ban duh mynsiem haba phai sha ka roi ka par namar ka roi ka par kan wan beit bad kaba donkam ïa ki paidbah ka long ban ai lad ïa ka UDP ban don ha ka bor da ka jingpynjop lang ïa kiwei ruh ki kyrtong ka seng ha kane ka kynti ba mynta.
Ha kawei ka liang, ka General Secretary ka UDP, Nongliput Unit, samla Airisha Mawlong ka la ong ba ka politik ka long kum ka kam shongkha-shongman namar shisien ba la bakla ban jied, la bakla shirta jingim bad hap ruh ban kit ban bah ïa ki jingeh shi junom.
Ha kajuh ka por, ka la kyrpad ïa ki paidbah ba kim dei ban dang ailad ïa ki seng kiba na shabar namar ki la dep ban knieh ïa ka hok jong ki trai-ri bad ka don ka jingma ïa ka jaidbynriew rit paid na ka daw ba kine ki seng ki don ïa ka thong ban pynrem ïa ki seng ’riewlum.
Shuh shuh, ka la buh ka jingkyrpad ha u Bah Lyngdoh ba lada ka UDP ka wan ha ka bor, ka dei ban pynkylla ïa ka ‘Reservation Policy’ namar ki samla ki jynjar bad lynñiar bad ki mad bun ki jingeh na ka jingnoh shiliang palat kane ka mat treikam. Kiwei kiba la ai jingkren ha kane ka sngi ki kynthup ïa u Bah Marshal Diengdoh, nongïalam barim ka NPP, Kong Madonna Langstieh, nongïalam ka Congress nalor kiwei-kiwei.
