Tura Rymphang 19:
Ka TMC ha ka Sngi U Blei ka la ban jur halor ka jingkynnoh bym biang ha ka synshar-khadar jong ka Sorkar MDA hapoh ka jingïalam ka NPP bad ka jingsniewdur ha ki liang bapher-bapher ha South Tura (kaba long ruh ka konstitwensi u Myntri Rangbah) bad kam ba dei tang ma ka, ka seng kaba lah ban wanrah jingkylla kaba ki paidbah ki dei hok ban ïoh.
“Ngi la sakhi ba dei tang ka TMC kaba lah ban ïakhun pyrshah ïa ka BJP. Naduh ka jingpynsngew ïa ki mat ki jura jong ki jaidbynriew jong ngi haduh ban dawa na bynta ka jingpynrung ïa ka Ktien Khasi bad Garo ha ka Khyrnit ba 8 ka Riti Synshar ka Ri, ki nongïalam jong ngi na ka por sha ka por ki la pynsngew ïa ka sur jong ki na bynta ki nongshong shnong ka Jylla. Ki briew ki long kiba stad bad ki ap kmang ïa ka 27 tarik u Rymphang,” la ong u kyrtong ka TMC na South Tura, u Richard Marak haba kren sha ki lad pathai khubor.
Ha kane ka sngi la ïadonlang ruh kiwei-kiwei ki nongïalam ka seng ba kynthup ïa u Sapford N. Sangma, West G.H District Coordinator; Ajay Marak, South Tura Block President, Chenny Tasha D. Marak, General Secretary bad Stephen Sangma, Joint Secretary na bynta ka South Tura.
Haba kdew ïa ki jaka ba thylli ha ka pule-puthi bad ka jinglong-jingman jong ki skul ha Tura, utei u kyrtong u la ong, “Kane ka Sorkar ka la buh hakhmat eh ïa ka pule-puthi ha ki mat ilekshon jong ka ha u 2018 bad ka la pan ïa ki ‘vote’. Hynrei ngi lah ban ïohi ïa ka jinglong ki skul ha South Tura, ka konstitwensi u Myntri Rangbah. Bun na kine ki skul ki la jot rathai. Ki khynnah kin hap ban pule ïa ki jingpule ba shakhmat jong ki ha ki ïing Community Center ha Dobasipara.”
Kitei ki nongïalam haba pan jubab na ka NPP halor ka jingbym biang ka roi ka par ha South Tura, North Tura, bad Raksamgre, ki la buh jingkylli halor ka jingbym biang ki bos.
Haba kynnoh ba ka don ka bamsap haba shyrkhei ha kine ki 5 snem ba la dep, u Marak u la ong ba lada hap ban pynpaw pyrthei ïa kiei-kiei baroh, kan shim por da ki bnai.
“Ha man la ki tnad treikam, ki don ki jingbym biang bad ki jingkynnoh bamsap bad ka TMC ka la pynsngew na kawei ka mat sha kawei pat namar ngi sngewkhia ïa ki briew lajong. Ha ki mat ilekshon jong ngi, ki don 10 kular bad ngin pyntreikam ïa baroh kine na bynta ki briew jong ngi,” la ong u Marak.
