Shillong, Rymphang 19:
Ka jingïalang hapdeng u Deputy Commissioner ka East Khasi Hills, u S.C. Sadhu kaba la long ha ka 13 tarik mynta u bnai bad ki dkhot ka Mawlai Town Dorbar (MTD) bad ka Seng Samla Mawlai Pyllun (SSMP) ka la rai ban khang ïa ka jingpynlong ‘Road Show’ ne ‘Car Rally’ hapoh 15-Mawlai konstitwensi.
Na ka liang u shongknor ba pynïaid ïa ka jingïalang, u la pynsngew ba ka jingthmu jong ka jingïalang ka long ban ïakren haba ïadei bad ka jingtuklar ban ym shah ïa kano-kano ka ‘Road Show’ ne ‘Car Rally’ kaba long kum shi bynta jong ka jingïalap ilekshon da uno-uno u kyrtong jong baroh ki seng saiñ pyrthei kumba la pynsngew da ka ophis jong ka MTD, Shillong ha ka 10 tarik mynta u bnai hapoh 15-Mawlai konstitwensi namar ka ilekshon ka ban sa long.
Hadien ka jingïakren sani bha, ka jingïalang ka la shim ïa ka rai ba ka MTD bad ka SSMP ka la pyntip ba baroh 5 ngut ki kyrtong ki la pynpaw ïa ki jingsngew jong ki bad ai ruh ka jingkyrshan ïa ka jingtyrwa kaba la buh hakhmat jong ki ban pynsangeh ha ka ban pynlong ïa ki ‘Road Show’ ne ‘Car Rally’ hapoh 15-Mawlai konstiwensi.
Hynrei, lah ban shah ïaid tang 50 tylli ki kali ha surok ha ka por jong ka jingïalang paidbah hapoh 15-Mawlai konstiwensi.
Shuh shuh ki dkhot ha kane ka jingïalang ki la mynjur ban ai lad ïa baroh ki seng ban ïalap ilekshon.
Kane ka long katkum ka kyrwoh na u District Election Officer, East Khasi Hills.
