Shillong, Rymphang 20:
U Myntri ka tnad kam pohïing barim ka Jylla, Bah Horju Donkupar Roy Lyngdoh u la khlad noh ha aspatal ha ka janmiet Lah Sngi U Blei namar ka jingshitom ha u klongsnam.
Katkum ka kyrwoh na ka Bethany Hospital Shillong, la wan pynkit ïa u Bah Lyngdoh ha kane ka jaka sumar ha ka por kumba 3 baje mynsngi, bad u la ïoh ïa ka jingpang ba la tip kum ka ‘Extensive Anteroseptal Myocardial Infarction’ lane ka ‘Heart Attack’.
“Watla ka kynhun doktor jong ngi bad ki nongtrei ka koit ka khiah ki la ïaleh katba lah, hynrei ka jingshitom ka la nang ban ha u bad u la khlad noh ha ka por 6:30 janmiet ha kane kajuh ka sngi,” la ong u nongaiktien ka Bethany Hospital, Shillong, Dr. Kyntiewlang Sanmiet ha ka kyrwoh khubor.
Mar syn ïoh jingtip halor ka jingkhlad noh jong u, ki bahaïing ha sem, da ki spah ngut ki baieid-bathoiñ lem bad ki nongkyrshan jong u, ki la wan poi sha aspatal hapdeng ka jingïam pait dohnud namar ka jingduh noh ïa utei u rangbah nongïalam.
U Bah Lyngdoh u la pynïasoh sha ka United Democratic Party (UDP) ha u snem ba la dep bad u ïoh ruh ïa ka tiket na ka seng ban long kum u kyrtong jong ka ha kane ka ilekshon ban wan.
Une u Myntri barim ka Jylla un ïa aireng pyrshah ïa u kyrtong ka National People’s Party (NPP), Bah Samlin Malngiang. U Bah Malngiang u la jop ïa ka ilekshon 2018 na ka Hills State People’s Democratic Party (HSPDP).
U Bah Lyngdoh, ïa uba ju tip kum u ‘Maheh’, u la long kum u Myntri ka tnad kam pohïing ka Jylla ha ka por ka Sorkar Congress hapoh ka jingïalam u Dr. Mukul Sangma.
U la jop nyngkong eh kum u MLA ka Sohïong ha u snem 1988 na ka Hill State People’s Democratic Party (HSPDP) bad bteng haduh u snem 1998.
Ha ka ilekshon ha u snem 1998, u la shah rem noh ha u Bah R.A. Lyngdoh jong ka United Democratic Party (UDP), hynrei ha u snem 1999, u la jop kum u MDC ka Congress na Sohïong-Nongspung konstitwensi.
Kumjuh, ha ka ilekshon ha u snem 2003, u la wanphai biang ha ka bor hadien ba u la pynrem noh ïa u Bah R.A. Lyngdoh. U la jop na ka Congress. U la bteng kum u MLA ka Sohïong haduh u snem 2018.
Ha ka ilekshon ha u snem 2018, u la shah rem noh ha u Bah Malngiang da 622 ‘vote’. U Bah Lyngdoh u la ïoh 11,338 ‘vote’ katba u Bah Malngiang u la ïoh 11,960 ‘vote’.
Haba phai sha ka jingïakhun ha Sohïong konstitwensi ha kane ka ilekshon ba mynta, ki don 6 ngut ki kyrtong ki ban ïa aireng ba kynthup ïa u Bah H.D.R. Lyngdoh (Bam Kwai ha Dwar u Blei) na ka UDP, u S. Osborne Kharjana na ka Congress, Bah Samlin Malngiang na ka NPP, Bah Sandondor Ryntathiang na ka HSPDP, Bah Sereph E. Kharbuki na ka BJP bad Bah Stodingstar Thabah na ka AITC.
U Myntri Rangbah ka Jylla, u Conrad Sangma haba pynpaw ka jingsngewlem halor ka jingkhlad noh u Bah Lyngdoh ha ka rynsan lad pathai, u la ong, “Ka long ka jingsngewsih ban ïohsngew ïa ka jingkhlad noh u Myntri barim bad ’riew saiñ pyrthei ba rangbah ka Jylla, Bah H. D. R. Lyngdoh. U Bah Lyngdoh u la shakri ïa ka Jylla ha ki liang bapher-bapher ha ki snem ba la leit bad u long u nongïalam uba la aiti met bad mynsiem ïa ki paidbah. Ka jingkhlad noh jong u ka long ka jingduh kaba khraw ïa ka Jylla. Ai ba ka mynsiem jong u kan ïoh ïa ka jingjahthait ka bymjukut.”
