Shillong, Rymphang 21:
U MLA barim ka Sohïong, Bah Samlin Malngiang, uba dei u kyrtong ka NPP u la phah ka khubor sngewlem hadien ka jingkhlad noh u Bah HDR Lyngdoh uba long u MLA barim uba la mih ban ïakhun kum u kyrtong ka United Democratic Party (UDP).
U Bah Samlin u la phah ïa ka khubor sngewlem sha ka ïing ka sem jong une u rangbah bad ha ka facebook page jong u, u la thoh ban pynpaw ka jingkyndit bad jingsngewsih kaba khraw mar ïa ïoh jingtip halor ka jingkhlad noh jong u Bah HDR ha ka janmiet jong ka 20-02-2023. “Nga phah ka khubor sngewlem sha i kurim, ki khun bad kiba ha īing ha sem baroh to U Blei Trai Kynrad un pyntngen ia ki, namar ngi tip ba ka jingim bad ka jingiap kadei ka jingbuh beit ryntih U Kynrad bad ai ba ka Mynsiem i Maheh H.D.R Lyngdoh kan ioh shong jahthait ha ka kti U Blei”
“Nga pynkynmaw ba i Maheh i la long teng u MLA ka Sohïong Constituency 25 snem, bad kum u MDC. Ha ka jinglong MLA i la bat ruh kum u Myntri Sorkar bad peit bun tylli ki tnat treikam. Kumta ngi pyrto ïa ki jingnoh synñiang jong phi ia ka Sohiong Constituency bad ia ka jylla Meghalaya baroh kawei”, la pynpaw u Bah Samlin.
Kum ban pynkynmaw, u Bah Samlin Malngiang u dei uwei u nongkyrshan ba radbah jong u Bah HDR Lyngdoh hynrei haba ka por ka la ïaid u Bah Samlin u la ïakhun ïa ka ilekshon MDC shiteng samoi bad long u nongjop ha kaba u la lah ruh ban jop ïa ka ilekshon MLA ha u snem 2018 pyrshah ïa u Bah HDR Lyngdoh.
