New Delhi, Rymphang:
U Lat barim jong ka Gujarat bad u nongïalam ba pawkhmat jong ka seng BJP na Delhi u O P Kohli u la khlad noh ha ka lah sngi U Blei, la ong ka jingthoh kaba la wan na ka seng BJP ha Delhi.
U Kohli, uba long u President barim jong ka seng ha Delhi, um don shuh ha ka met kaba koit bakhiah ha kine ki ar ne lai bnai ba la leit bad u la khlad noh ha ka jaka ai jingsumar kaba don ha Noida, une u la khlad noh ha ka rta kaba 87 snem, la ïathuh ki nongïalam ka seng BJP. Ka jingpyndepbad leh burom khatduh ïa ka met jong u ka la long hynnin ka sngi ha Nigam Bodh Ghat, ki la ïathuh.
U Kohli u la long u nongbud uba la trei na ka bynta ka seng ha kaba la synran ïa u da ki hajar ngut ki nongïalam bad ki nongbud jong ka seng da bun bun snem, la ong u Presdent jong ka seng BJP ha Delhi u Virendra Sachdeva.
U Kohli u la sdang ïa ka kam shakri ha ki kam saiñ pyrthei kum u nongïarap jong ka seng Rashtriya Swayamsevak Sangh bad u la trei bad ka ABVP, ka Delhi University Students Union bad ka Delhi University Teachers Association ha kiba bun ki bynta, la ïathuh u Sachdeva.
Ha u Kyllalyngkot jong u snem 1991, u Kohli u la rung ha ka kam saiñ pyrthei bad u la shimti ïa ka kam kum u President jong ka seng BJP ha Delhi.
U la bat ïa ka kam da lai samoi bad u la mihkhmat na ka Delhi ha Rajya Sabha.
Kum u dkhot jong ka National Executive jong ka seng BJP, u la bat ïa ka kam kum u nongkhmih ban nongpynïaid jong ka seng ha Jammu & Kashmir, Himachal Pradesh, Chandigarh, Punjab bad Haryana.
U Kholi u la long u Lat jong ka Gujarat naduh u snem 2014 haduh u snem 2019, la ong ka jingthoh kaba la wan na ka seng BJP ha Delhi.
