Shillong, Rymphang 21:
U Bah Prestone Tynsong uba dei u National Vice President ka National People’s Party (NPP) bad Symbud Myntri Rangbah ka jylla, u la ong ba ka NPP kan sa thaw beit marwei ïa ka Sorkar ba thymmai bad kam donkam satia ïa kiwei ki seng saiñ pyrthei namar ka NPP kan jop palat 32 ngut ki MLA ha kane ka ilekshon.
“Ngim donkam shuh ïa kiwei ki seng saiñ pyrthei na ka bynta ban thaw ïa ka sorkar thymmai, namar tang ka NPP marwei ngin lah ban thaw ïa ka sorkar naba ngin jop palat ïa ka 32 ngut ki MLA ha kane ka ilekshon ka ban long ha ka 27 tarik mynta u bnai,” la ong u Bah Prestone haba kren sha ki lad pathai khubor ha ka sngi Ba-ar.
“Ha kine ki 5 snem kum ka seng NPP ngi la ïatreilang bad ki seng saiñ pyrthei bapher bapher ba kynthup ïa ka BJP, UDP, HSPDP, PDF, NCP ha ka sorkar Meghalaya Democratic Alliance (MDA), hynrei mynta pat ki sdang ban kynnoh bad kynthoh pyrshah ïa ka seng NPP kaba ïalam ïa ka sorkar MDA.
“Ka jingkawang ktieh kitei ki seng mynta ïa ka NPP ka jur bha khamtam eh ïa u Myntri Rangbah ka jylla (Conrad Sangma) bad ïa nga kum u Symbud Myntri Rangbah. Kane ka paw shai kdar ba ka seng NPP ka khlaiñ ha kylleng sawdong ka Meghalaya kaba la pynlong ïa kine kiwei kiwei ki seng saiñ pyrthei ban tieng ban smiej bad ki pynthohbria laiphew jait,” la ong u Bah Prestone.
U la ong ba ïa ki jingkynnoh baroh pyrshah ïa ka NPP, ki jingshisha kin sa paw ha ka 2 tarik jong u Lber, namar dei tang kane ka Sorkar kaba la shim ïa ki sienjam kiba tyngeh ban kynthup ïa ka jingpynbeit ïa u pud u sam, ka ILP, ka Them Metor bad ban pynïoh ïa ka jingithuh ïa ka ktien Khasi bad Garo ha ka kyrnit baphra.
“Dei ma ngi na ka NPP kiba la maitphang ïa kine ki mat bad rah sha ka ïingdorbar thawaiñ ka jylla ban ïakren ïa kine kiei kiei baroh,” la ong u Bah Prestone.
“Ka NPP ka la ïengskhem ban shakri ïa u paidbah lyngba ka Election Manifesto bad Vision Document na ka bynta u snem 2023-2028 bad ngi la pyni shai ïa ki mat treikam kiba ngi ngin leh bad wat ïa kaba ngim lah ban pyndep ngin ïaleh ban pyndep noh ïa ki,” la ong shuh shuh utei Symbud Myntri Rangbah ka Jylla.
U la ong, ki paidbah ki dei ban bishar ïa ka rukom kynnoh bad ïa ki rukom kren ki jong ki (kiwei ki seng saiñ pyrthei) kaba baroh baroh ki kynthah bad kawang maw beit tang ïa ka NPP.
