D.H.Kharkongor
Nga la nangap khmih lynti ia ka jingbeh jong ka lyerpynkylla aiom ne ka lyer Pyrem pynban ym pat don dak don shin ia ka, wat haduh mynta. Lehse ka Lyer Pyrem kan sa wan bad kan sa khie tad ynda kut noh shwa kane ka Lyer khyllah ba Shisien San Snem. Lehse wat ka lyer Pyrem ruh ka dang ai lad shuwa ia kane ka Lyer Shisien San Snem, wei ba ka bapli ka ‘Lyer Shisien San Snem’ ka iohlad ban paswut kumne, tang Shisien San Snem. La nang khmih lynti ruh de ia ka jingthang dusmon bad namar kata ia ka jingpluh ne ka jingkem ding ka jong ki khlaw ki btap. Phewse kane ruh imat kan dang sangeh shwa wei ba wat ki Shrieh Khlem Tdong ruh ki dang ia shongshit than eh ha kane ka Tamasabah ba Shisien San Snem.
Ka Sor Shillong ruh ka kynjah jar na ki kam shongshit biej jong ki samla lud kiba alhia bad khlem kam khlem jam. Kat shaba phai ba iohsngew kyndiang ia ka jingkynjah jar ka jong ki samla lud ba bthih jabieng, kiba khia-kti khia-kjat bad ba la shah ialam bakla noh ha ki Nonghikai jong ki Skul Surok. Ki samla lud ba ju apthap tang lano ban don noh kita ki ‘programme jingiakhih’. Ki samla lud ba ju angnud hir hir ban ioh ban nangpynjur shuh shuh ia ki ‘programme jingiakhih’, naba kim don jingtbit da kumwei pat lait na kaba ‘iakhih’. Lehse ki jar jar wei ba ki ruh, kumba long lem kita kiwei kiwei, ki lah ia poi ban ia don lang beit noh tang ha la ka shnong ka thaw, na ka bynta ban ia shim bynta shitrhem ha kane ka Tamasabah ba Shisien San Snem.
Kiba baroh shikatta ,ynda ha Sor Shillong, kiba bein kiba khoh bad kiba kynnoh kynthoh pyrshah ia ka Sorkar MDA. Kiba ju hylla jam”we condemn … down down, …we demand…. no Rest…” katba mynta kumne pat de, ynda ha la shnong bad ha la ka Assembly Constituency ki ia hylla jam bad hylla shongshit pat de ‘Vote for NPP’. Kata, lada kim ia hylla shla bad hylla shongshit”Vote for UDP” ne “Vote for HSPDP” ne”vote for PDF”.
Ym lah khlem da ithamula bad khlem da sngew sammut ia kiba kum kitei, wat kiba la heh kiba la san ha ka kyrta, kiba ialade shwa ne nalade shwa kim don ia ka nongrim kaba shisha bad kaba shkem. Kiba iasyriem thik kum ki sla dieng ba la iap satai bad kum u syiap ba kie ka um saw jong ka lyiur. Kiba ka lyer pyrem bad ka um saw jong ka lyiur ki iehnoh bein pat ia ki,ha kat kaba ki sngewmon.Ki riew khlem nongrim kiba don por katban leit sngap bad shah shkor dnong ia kata ka jingpynshai ka jong ki kyrtong kiba ialade shwa ruh kim don ia ka nongrim kaba shkem. Ki riew khlem nongrim kiba ym tang ba ki sngewtynnad hynrei kiba sngewdei hi ruh ia kat kaba kita ki kyrtong ki khlei. Te shano bad kaba kumno kata ka lawei jong ka jaitbynriew hi baroh kawei ba wat haduh kane ka khyllipmat kaba mynta ngi dang hapdeng jong ngi kum ka jaitbynriew, ia shibun kiba kum kitei ki nongjied nongmihkhmat, kiba ialade shwa ki dei ki riew khlem nongrim. Ki riewkhlem nongrim kiba sngewtynnad ban leit sngap lorni wat tang ia kum kane ka jing-iathad ka jingiabad ka jong ki shiiing shi sem.
Nud ban ong kumta wei ba ka NPP, ka UDP, ka HSPDP, ki PDF bad ka BJP ki dei ki shiing shisem ne ki dkhot jong ka juh hi ka longing longsem. Kitei baroh ki iashong ki iasah, baroh kane ka San Snem, ha u juh u tnum u tyndai. Ki ia bam kdang ruh na u juh hi u khiew ja bad na u juh u hi u khiewjyntah. Mynmied ynda la ia kdang ki baroh lang ki leit ban ia kiew thiah ha ka juh hi ka palong tiah bad ki baroh lang ki da iakup syaid ruh de, baroh shimied tad haduh ynda shai ka bneng, da ka juh hi ka rajai ne ka kumbor. Ki da ia rai lang bad ki da ia pyntreikamlang ruh ia kat kaba ki la ia rai lang ne mynjur lang ha ka ‘Cabinet’ ka jong ki.
Ko phi u paid ba khlem nongrim to tip ba ym lah thaw Sorkar lymne pynkhyllem Sorkar khlem kitai ki MLA Garo ne ki MLA A’chik. To tip ruh ba U Conrad u hap ban iehnoh ia ka jinglong MP ka jong u tang namar ka jingiapihun hapeng kine ki MLA Khasi ki jong ngi, kiba kham lah ba long CM da u Conrad Sangma ban ia kaba yn ioh long CM da ma phi kat ban duh noh thiaw pat ma nga. Ki jong ngi kiba ia kaba yn ioh da maphi bad duh noh pat manga te ka kham bha ba ngin ia duh lang, phi ruh nga ruh, bad ailad beit noh da utai u A’chik.
To tip ruh ba yn ioh biang ban long CM uwei na kiA’chik, lada ka NPP kan jop kham bun na Ri Lum Garo. To tip ruh ba ngin sa ioh ia kata ka ‘Khasi-Jaintia State’ tad ynda ngi la dep ban pynjot hi thiaw ia la ka jong ka mei mariang. Kata, tad ynda ngi la dep ban khlong bad ban sei lut naphang lin ia ki dohjem jong ka meiramew ka jong ngi. Tad ynda ngi la pom lut plain ia ki khlaw ki btap bad tad ynda ngi la thang rnga ia kat kaba dang sah khyrdong. To tip ba ka jingtih bad ka jingkhlong be-ain ia u dewiong ne ka ‘illegal rat hole mining’ ka jur eh tang ha kane ka Ri Lum Khasi-Jaintia ka jong ngi. Kumjuh ruh ka jingpomdieng pathar lem bad ka jingthang rnga, ka jur eh tang hangne ha Ri Lum Khasi- Jaintia jong ngi. Wat ki ‘Cement Plan’ lem bad ki ‘Coke Plan ruh ki da speh khyllah beit thik tang ha kane ka Ri Lum Khasi-Jaintia ka jong ngi bad ym shatai sha Ri Lum Garo.
To kynmaw ba dei tang ka AITC ne TMC, ba la lamkhmat da u Dr. Mukul Sangma, kaba shongiaineh beit khop kum ka liang pyrshah ne ka ‘opposition’, tad haduh kaba kut kane ka San Snem. Kita kiwei te ki la iehnoh ia u Dr. Mukul wei ba ki la pynshisha ba ki dang iaidei hi ki ‘shameless political opportunist’, da kaba pyniasnoh ialade bad ka MDA. Ki ‘opportunist’ ki bym lehrain wat ban nguid biang noh jluk ia la ka jong ka prie, kaba ki la khlei. Lait na ka TMC bad kane ka VPP kita kiwei kim don hok ban takrain jem kumne ia kane ka Sorkar MDA naba kan dei tang ka jingiathad, kaba shiing shisem. Tip shai ba lait na phi ym don mano mano ruh ba lah ban tip shano phi thep ia ka ‘vote’ ka jong phi. Shim namarkata, na baroh kiba tyrwa sbun ia ka tyngka, leit ruh ban thep ‘vote’, tangba kyrwit pat de ha u NOTA, da kaba niew ia u ba u dei u AOTA (All Of The Above-Givers).
