Rymphang:
Ka sorkar Taliban ka la ong ba kan sa pynkylla ïa katto katne ki jaka shipai sha ka jaka ïakhaïï business.
Ka Afghanistan ka la ngat ha ka jingduk kaba khraw naduh ba ka Taliban ka la ïoh bat ïaka bor hapoh ka ri ha u snem 2021. Ki shipai ba na bar ri ki la don hapoh katei ka ri la kumba 10 snem tam.
Ïa kane ka rai la pynbna da u acting Symbud Myntri rangbah u Mullah Abdul Ghani Baradar.
“La rai ba ka tnad Ministry of Industry bad Commerce kadei ban bat noh ïaka bor ïa kine ki jaka shipai kiba sah na ka bynta ban thmu ban pynkylla ïa kitei ki jaka sha ki jaka ïakhaïï,” la ong u Mullah Baradar ha ka jingkren jong u hynnin ka sngi.
U la bynrap ruh ba ka projek kan sdang na ka nongbah kaba heh duh ka Kabul. “Ka Taliban ka la donkam kyrkieh ban pynkhlaiñ ïa ka ïoh ka kot bad ka khaïï ka pateng,” la ong u Muhammad Faizal Bin Abdul Rahman shaki lad pathai khubor.
“Kaba kham kongsan, Ka Taliban ka donkam ban shna ïaki jaka na ka bynta ki jingshngaiñ hajan ka nongbah kaba heh bad ki border na ka bynta ka jingïakhaïï kum ka China… bad ban pynkhlaiñ ïa ka kam ïakhaïï bad ki ri ba marjan,” u la bynrap.
Ha u snem 2021 u bnai Nailar, ki shipai US ki la mih noh na Kabul, kaba la pynkut noh ïa ka jingdon jong ki hapoh Afghanistan bad ka thma ba la neh slem jong ka ri America.
Kane ka jingïaleh ka la shim ïa ka jingim jong ki hajar ngut ki briew. Dang shen mynta u snem, ka Taliban ka la ong ba ka la thmu ban ïateh soskular bad kawei ka company na China na ka bynta ban tih ïa ka umphniang na ka phang northern Afghanistan.
Ka Beijing kam pat ithuh tikna bha ïa ka sorkar jong ka Taliban bad ka don ka jingsngewtynnad ïa kane ka ri.
