Shillong, Rymphang 22:
Ka Election Commission ka ri India ka la mana da kaba pynmih ka jingbthah ban pyntikna ba ka don ka jingpyrkhing bha ha ka sngi thep vote, ha kaba ïa ki nongthep vote ym dei ban shah ba kin rah mobile phone ne kino-kino ki kor ïakren kiba khlem waïar, hapoh ka jingjngai kaba long 100 mitar na ki jaka thep vote, bad hapoh ki jaka thep vote.
Katkum ka jingbthah kaba la pynmih, la ong ba tang ki nongpeit pyrman (Observers/Micro Observers), ki ophisar kiba pynïaid ïa ka jingthep vote, bad ki pulit pahara la shah ban rah mobile phone, tangba ym dei ban mih ka jingsawa sur na ki mobile phone.
La bthah ruh ba dei ban pyntreikam pyrkhing bha bad bud ryntih ïa ki jingbthah namarba ka don ka jingsuba jur hapdeng kiba bun ki paidbah, ba ki nongthep vote ki lah ban pyndonkam bakla ïa ka mobile phone jong ki ha ki jaka thep vote katba ki dang leit ban thep ïa ka vote jong ki.
