New Delhi, Rymphang:
Hadien ba ka Election Commission ka la ithuh ïa ka kynhun jong u Eknath Shinde kum ka kynhun bashisha jong ka seng Shiv Sena bad ai jingbit ban pyndonkam da ka shap u khnam bad ka ryntieh, u Myntri Rangbah jong ka Maharashtra u la shah rai ba un long u heh nongïalam jong ka seng ha ka jingïalang kaba nyngkong jong ka kynhun ki nongkitkam jong ka seng ha kaba la pynlong ha Mumbai ha ka janmiet jong ka sngi Ba-ar.
Ïa ka jingïalang la pynlong hapoh ka jingïalam jong u Myntri Rangbah ka jylla u Eknath Shinde.
“Ngi la pdiang ïa u ba un long u nongïalam jong ka seng Shiv Sena,” la ong u Myntri jong ka tnat Industries ha Maharashtra u Minister Uday Samant.
U Myntri u Dada Bhuse u la shah thung ba un long u heh jong ka Disciplinary Committee jong ka seng katba u Shambhuraj Desai bad u Sanjay More ki la shah thung ba kin long ki dkhot jong ka kynhun. Ka la rai ruh ban thung ïa u Siddhesh Kadam kum u Secretary jong ka seng ha kane ka jingïalang.
Ïa ka kyrdan kum u heh nongïalam jong ka seng bad u Working President la weng noh ha ka seng Shiv Sena.
Ha ka por ba la don ka jingïalang, ki la don ka jingdawa ba la pdiang ha kaba u nongïaleh laitluid jong ka ri u Vinayak Damodar Savarkar u la dei ban ïoh da ka khusnam Bharat Ratna, kyntjhup 80 percent ki kam ba la dei ban ai sha ki nongshong shnong jong ka jylla, kumjuh la dawa ba ïa ki kyrteng jong ka Veermata Ahilyabai Holkar, Chhatrapati Sambhaji Raje la dei ban kynthup lang ha ka thup jong ki riewpawkhmat bad riewshlur jong ka ri.
La kynthup lang ruh halor ka jingdawa ba la dei ban ai noh da ka bhah kaba kyrpang na ka bynta ka ktien Marathi ban lah ban pyndonkam ha ka thoh kot thoh sla, “ïa ka Churchgate Station ha Mumbai la dei ban nam da ka kyrteng jong u Chintamanrao Deshmukh,” u la bynrap.
