Nongstoiñ, Rymphang 22:
Ki paidbah nongkyrshan jong ka seng VPP Nongstoiñ ha ka sngi Balang ka taïew ki la mih shakhmat ban ïa shad da ka jingtem ïa ka jingrwai “Kong Deng, Kong Nah ha u Prah” ha ka rally jong ka VPP ïa kaba la pynlong ha sor Nongstoiñ ha shuwa ban sdang ka jingïalang ïalap ilekshon na ka bynta u kyrtong jong katei ka konstitwensi.
U President ka VPP u Bah Ardent M Basaïawmoit haba kren ha ka jingïalang u la ong, pynjop lut ïa baroh 18 ngut ki kyrtong ka VPP hangta phin sa ïoh ïa u Myntri Rangbah uba khlaiñ uba ïeng na ka bynta ka jingeh jong ka jaidbynriew.
U Bah Ardent u la ong ruh, “Ko ki paidbah ba ieit haduh mynta kim pat sei ïa kita ki nongïalam ba nud ban leit sha Delhi hakhmat u Myntri Rangbahduh ne hakhmat u Amit Shah ban ong ba kum ka jaidbynriew Khasi ngi don la ka jong ka dustur.”
Nalor kata u la ong, “Jied ïa ka VPP phin i kumno ngin kren ïa kitei ki nongïalam hapoh Delhi, ngin nym shah katba ki leh ma ki, ngin ïeng ngin pyneh ïa ka jong ka hok, dei ei na kata ka daw ba ngi da kwah eh ba ki paidbah kin ailad ïa ka VPP,” bad bynrap, “Nga nud ban ong lada phi ailad mynta ïa ka VPP phin nym babe.”
U Bah Ardent u la ong, haba seng ïa ka VPP don shibun kiba ong kheiñ troiñ, don shibun ki seng ki ong kan poi shano kata ka seng thymmai, hynrei mynta ki MLA na ki seng bapher-bapher ki king-khlieh mynta hangno ka jaka ba don ka seng VPP. U la ong, “Ngi, ngi don ka jingkyrmen ba ngin poi sha ka thong kum ka VPP.”
Shuh shuh u la ong ruh ba la seng ïa ka VPP da ka jingpyrkhat na ka bynta na 50 snem ka ban sa wan ym dei tang na ka bynta ka jingmyntoi shi sngi. Nangta u la ong ruh ba la pynlong ïa kane ka jingïalap ban pynshai halor kumno ban saiñdur ïa ka pateng ka ban sa wan.
“Ka Jylla Meghalaya ka dei kaba duk tam napdeng ki Jylla jong ka thaiñ shatei lam-mihngi namar ba la jyrsieh ka bamsap bad ka sorkar kam nud ban ïathuh ba ka pla tyngka ka long kaba thylli bad ka sorkar kam don pisa bad ka sorkar MDA ka la pyntyllun ïa ki kam tang da ka ram,” la ong u Bah Ardent.
U la kynthoh ruh ba ka sorkar MDA ka la kam trai ïa ki skhim jong ka sorkar pdeng bad u la ong ruh ba u Myntri Rangbah bad u Symbud Myntri Rangbah ka Jylla ki la pynkiew skong ïa ki MLA bad ki kyrtong jong ki ban ong ba ki la trei shitom ban wanrah ïa ki skhim pynroi.
Kumta u la ong ba dei halor kitei ki jingbamsap la pynlong ban seng nongrim ïa ka VPP ban wanrah ïa ka synshar khadar kaba khuid ban pynkut ïa ki kam bamsap ban pynkut ïa ka jingpynlut phut bad ban pynkhlaiñ ïa ka pla tyngka jong ka sorkar. Ynda la khlaiñ ka pla tyngka jong ka sorkar ki paidbah kin ïoh ïa shibun ki jingmyntoi bad lada ka VPP ka wan ha ka bor u la ong ban pynkhuid ïa ka bamsap kumba pynkhuid ïa ka Ïewduh ha ka por ba u long CEM ka KHADC.
