Rymphang:
Ka Bharatiya Janata Party kaba ïakhun ïa ka ilekshon ha Meghalaya bad kum ka seng kaba don ha baroh kawei ka ri, ka don la kajong ka nongrim bad ka saiñ pyrkhat. Kum ka seng saiñ pyrthei kaba heh bad kaba dei ban trei na ka bynta baroh lang ki nongshong shnong jong ka ri India, bunsien ka shah buh jingkylli kum ka seng saiñ pyrthei namar ka don ha ka ïa ka kata ka jinglong tynrai Hindu lane Hindutva. Ki don ruh ki kynhun kiba ju ïaid lang da kajuh ka sur ban pynrung ïa kane kajuh ka jingsngew bad jinglong tynrai. Lada phai sha ka ilekshon sha ka Ïingdorbar Thawaiñ ha Meghalaya, ka BJP ka la pynïakhun kyrtong ha baroh 60 tylli ki konstitwensi.
Katno ngut kan ïoh MLA ym lah satia ban ïathuh lypa. Kawei na ki nongrim ba ka BJP ka ïeng ban ïakhun ha kiwei pat ki Jylla, ka dei ka jingïada ïa ki masi ha kaba la khang syndon ban shohdoh masi bad bam dohmasi. Ka jingkren jong u President ka BJP ha Meghalaya, Bah Ernest Mawrie shaphang ka dohmasi ka la pynkhih ïa ka jingpyrkhat jong kiwei pat ki seng saiñ pyrthei ha kiwei pat ki Jylla kiba ju ïaid lang ha kajuh ka thong bad donlang kajuh ka jingmut. U Bah Mawrie u la ong ba ha Meghalaya, baroh ki bam dohmasi bad ma u ruh u bam dohmasi khlem don ka jingkhang ne jingpyrkhing. Lehse kane ka pyndiaw pynban ïa ka BJP ha kiwei pat ki jylla.
Hynrei namar ka jingdonkam ban thied ïa ka jingieid ki paidbah bad ban ïoh jingjop, kum katei ka jingsngew kam dei ban don bad la shu sngap la ka sngap noh. Tangba ka BJP ka la shah ther ha ka Shiv Sena kaba dei ka kynhun jong u Uddhav Thackeray bad wohnia ïa ka jingpyni ar jinglong ka BJP ha Meghalaya bad ha kiwei pat ki bynta jong ka ri India. Ka Shiv Sena ka la ong ba ka ‘Hindutva’ jong ka BJP bad ka jingieid ïa ka masi ka dei kaba shu leh mynleh bad kynnoh ruh ba kita ki jinglong Hindutva jong ka ki kylla rong bad kylla ar jinglong katkum ka jingdonkam jong ka saiñ hima ha kylleng ki bynta jong ka ri. Ka BJP kaba la ïoh ban synshar ha Assam, ka la wanrah ïa ka aiñ kaba tip kum ka Assam Cattle Preservation (Amendment) Act, 2021 ban tehlakam ïa ka jingshohdoh bad shalan masi sha kiwei ki Jylla kum sha Meghalaya, Nagaland, Mizoram bad kiwei. Wat u Myntri Rangbah ka Assam, u Dr Himanta Biswa Sarma ruh u la kren kyrpad teng ba donkam ban pyrkhing ïa ka jingbam dohmasi ha ki jaka ba sah bun ki briew kiba dei ki Hindu. Lehse mynta hap shu sngap shwa khnang ban kiew ka jingïoh MLA bad ynda la ïoh shuki, yn sa ïa peit pat kumno ban leh.
Ka BJP ka buh jingkyrmen bha ban ïoh thaw Sorkar wat lada kan ïoh tang hapoh 10 ngut ki MLA. Lada kat u hehduh ka BJP ha Jylla u la ong ba ym don jingwit ei ei ruh em ïa ki jaidbynriew ha Meghalaya kiba bam doh masi, ka jingkylli ka long, hato yn pyllait lynti laitluid ban wanrah ïa ki masi na ki Jylla kiba synshar da ki Sorkar BJP? Ki paidbah kin thep ïa ka vote jong ki ha Meghalaya bad Nagaland ha ka 27 tarik Rymphang, 2023, bad ka jingñiew vote kan long ha ka 2 tarik Lber, 2023. Ka Meghalaya kan sa ïoh ïa ka Sorkar kaba thymmai ha ryngkat bad ka Jylla Nagaland, bad Tripura kaba la dep ban thep vote ha ka 16 tarik Rymphang, 2023.
