Shillong, Rymphang 23:
Hadien ba ki paidbah bad kiba ieid kiba thoiñ ki la ïoh ban peit bad ai khublei khatduh bad ban lehburom khatduh, ïa ka met u Myntri Sorkar barim, u Bah HDR Lyngdoh la tep donburom noh ha Sohïong ha ka sngi Palei, hapdeng ka jingïam bad jingbynnud ki paidbah ïa la u nongïalam uba la ju khot ieid da u Maheh, bad uba ki la don jingkyrmen ba un shahjied biang kum u MLA ha kane ka ilekshon MLA, 2023.
La tep ïa u Bah HDR shadien jong ka ïingsah jong u kaba don ha Sohïing. Ha kane ka sngi lehburom khatduh, la wan ban sngewlem da ki phew hajar ngut ki paidbah ym tang na Sohïong, hynrei na kiwei ki jaka ruh.
Ha kane ka sngi, la ïoh ka jingkren na u khun jong u Bah HDR, u Bah Nathaniel Osbert Rymmai, u pyrsa jong u Bah HDR u Bah Synshar Lyngdoh Thabah bad kiwei kiwei ki la ai jingkren ha kane ka sngi ba lehburom khatduh. Nangta kim lah khlem da pynpaw ba ka dei ka jingduh kaba khraw namar ka jingkhlad noh jong une u nongïalam uba la aiti lut na ka bynta ki paidbah ka Sohïong konstitwensi kum u nongmihkhmat paidbah.
Nalor ka jingbuh syntiew kum ka dak ka jingburom, la tap ruh ïa ka lama jong ka UDP halor ka synduk jong une u nongïalam bad la pyndep ïa ka jinglehniam ontep da ka Balang Presbyterian.
U Bah HDR, uba la long u MLA ka Sohïong la bun phew snem naduh ba u la shahjied nyngkong ha u snem 1988, u la long ruh u Myntri Sorkar ha ki snem ba la leit noh ha ki Sorkar bapher bapher ba la ïalam da ki Myntri Rangbah barim ka Jylla.
U la long ruh u kum u Myntri uba peit ïa ka tnat pulit ka Jylla nalor ka tnat PWD, Transport, bad kiwei kiwei ki tnat treikam ka Sorkar Jylla.
U Bah HDR u la don kham bun snem bad ka Congress bad dei ha u snem 2022 ba u la rung sha ka UDP na ka bynta ban ïakhun biang ïa ka ilekshon na Sohïong konstitwensi.
Namar ka jingkhlad noh jong u Bah HDR kum u kyrtong ka UDP, ïa ka jingthep vote ha Sohïong konstitwensi la pynsangeh noh shwa, hynrei ka jingthep vote ha 59 tylli ki konstitwensi kan ïaid beit ha ka 27 tarik mynta u Rymphang.
