Shillong, Rymphang 23:
U nongïalam ba ha khliehduh jong ka National People’s Party (NPP), u Conrad K Sangma bad uba long ruh u Myntri Rangbah ka Jylla, u la ong ba kam don jingmut satia ban jied ne kyrshan ïa ka TMC ne ïa kiwei kiwei pat ki seng saiñ pyrthei namar ïa ka Sorkar ba thymmai yn thaw da ka NPP.
U Conrad u la kren ïakren ha ka jingïalang ïalap ilekshon kaba la long ha ka sngi Palei ha Dadenggre na ka bynta ban pan jingkyrshan ïa u kyrtong ka NPP u James PK Sangma bad uba dei ruh u MLA ka constituency bad ha kajuh ka por u hynmen jong u.
Ha kane ka sngi, u Conrad u la khot bad wer ïa ki dkhot jong ki seng saiñ pyrthei bapher bapher kynthup ka TMC ba kin wan ïasoh noh sha ka seng NPP bad ban ai ïa ka jingkyrshan.
“Wat nym pynsepei kai ïa la ka jong vote ka jong phi namar kan nym don jingmut ban kyrshan ïa ka TMC ne kiwei kiwei ki seng. Ka NPP kan sa thaw ïa ka Sorkar. Kumta mih na la ïing ban jied bad kyrshan ïa ka NPP,” la ong u Conrad.
Haba shim ïa u nongïalam ka TMC bad Myntri Rangbah barim u Dr. Mukul Sangma kum u nongïalam ba synshar donbor, u Conrad u la ong, “U Mukul u lah ban ïasoh sha ka TMC, hynrei u dei ujuh u briew, uba la donkti shim ïa ka jingim jong kiba bun ki mynsiem ba lui-lui bad kum ka ri-lum Garo kan ym klet ïa ka jingjia ha ka 30 tarik u Nailur, ha kaba 9 tylli ki mynsiem briew ki la duh ei.”
Shuh shuh u Conrad u la ong, “U Mukul u la ieh ïa ka Congress, namar ka jingpyrkhat ba um don lawei shuh ha ka Congress. Hynrei u khlem da kheiñ bha ba ki paidbah ka ri-lum Garo kin nym pdiang ïa ka seng kaba dei na shabar haba ki don ka lad ban jied ïa ka seng na la ka jong ka Jylla.”
Haba kynnoh ba u Dr. Mukul u la treikam da kaba pyndonkam ïa ka bor bad kiar ïa ki jingïakren ha ka ban pynbeit ïa kino-kino ki jingeh ne jingshah tynjuh, u Conrad u la ong, ka NPP ka ngeit ha ka ban sngap ïa ka sur jong u paidbah.
U la ong ba ha kine ki san snem ki la don shibun ki jingtynjuh hakhmat ka Sorkar, hynrei ki la don ki khep ruh ba ki kynhun seng bapher bapher ki la hap ban ïakhun pyrshah ïa ka Sorkar. Tangba ka Sorkar kam ju pyndonkam ïa ka bor bad ka la jied ïa ka lynti jong ka jingïakren ban pynbeit ïa ki jingeh jong ki.
U Conrad u la ai khublei ïa ki paidbah ka Dadenggre Constituency kiba la ai ka jingshaniah ha u James Sangma halor ki kam kiba u la trei bad ruh ba u long u nongïalam ba don ka jingkitkhlieh.
Shuh shuh ha kane ka jingïalang u Conrad u la pyntip ba ka projek shna surok na Rongram-Dadenggre bad Phulbari ka dei kaba la shah iehbeiñ la bun bun snem, hynrei u James Sangma u la phah pyntrei biang ïa kane ka surok ba thymmai ha ka jingmang tyngka ba kot T.80 klur.
U la ong ruh ba lada la shah jied ha ka bor, ka jingdawa ban pynkha ïa ka District thymmai bad ka Dadenggre kum ka Headquarter, kan dei ka mat treikam ba hakhmat eh jong ka Sorkar Jylla.
Haba kren ha ka jingïalang, u James u la ai khublei ïa ki paidbah ka Dadenggre kiba la ïawan paidbah ban pdiang ïa u National President ka NPP Conrad K Sangma. U la ai khublei ruh ïa u Conrad halor ka jingkitkhlieh lem ïa ka constituency da kaba ai ïa shibun ki kam pynroi ha ka thaiñ.
Ha kane ka rynsan ïalap elekshon, la ïoh jingkren ruh na ka kmie u Conrad bad u James Sangma, ka Soradini K Sangma.
Ka Soradini kaba dei ka kurim u (L) P.A Sangma. ka la kyntu ïa ki paidbah ka Dadenggre ban vote ïa u khun jong ka. Nangta ka la pyntip ruh ba ki paidbah ka ri-lum Garo ki la leh shibun kiei kiei na ka bynta ka longïing jong ka, kaba u kurim ba la khlad noh, u la bynshet ha ki khun ba kin trei na ka bynta ki paidbah ka ri-lum Garo.
