Bengaluru, Rymphang:
U Myntri jong ka Women and Child Development u Halappa Achar u la ong ba ka sorkar jylla ka la shim ïa ki sienjam ban khanglad ïa ki kam sniew pyrshah ïa ki kynthei bad la ong ba ïa ka bai lutksan ban ai sha ki lanot kiba la shah theh ‘acid’ la pynkiew sha ka T. 10 lak.
Kum ka jingai jubab halor ka jingkylli jong u MLC ka seng Congress u Saleem Ahmed ha Legislative Council, u Myntri u la ong ba ka bailutksan sha ki lanot shah theh ‘acid’ ka la pynkiew na ka T. 3 lak sha ka T. 10 lak.
U Myntri u la ong ba ki heh ba dei khmih ki la pynsted bad pynïaid shakhmat ha kaba ïadei bad ka jingjia jong ka jingshah theh ‘acid’ ba dang jia shen ha Kanakapura bad u la leit ruh ban jngoh sha ka jaka ai jingsumar ïa kawei ka khynnah kaba la shah thombor.
U Achar u la ong ba ka sorkar ka la shim ïa ka rai ban pynshitom da kaba tyngeh ïa kito ki runar kiba donkti kum ha kine ki jait kam bad la tyrwa ban ai sha kum kine ki lanot ba kin ïoh jinghikai pyntbit ha ki kam ba kin sa ïoh trei khnang ba kin lah ban kyrshan ïalade.
Ki la don bun jait ki rukom pyntreikam ba la shim hapoh ka skhim Nirbhaya bad ka Social Welfare Department ka la pynbiang ha ka ban ai jinghikai pyntbit ïa ki khynnah pule kiba sah Hostel kumno ba kin nang ban ïada ïa la kajong ka jingim, u la ong.
