Ludhiana, Rymphang:
Ha ka jingai jingkren ha kaba ïadei bad ka jingpyntreikam kaba dang shen halor ka jingpynpra ïa ki ïing ba la shna beaiñ, ki heh ka Civic Body ki la ong ba ïa ki ïing kiba la shna beaiñ la pynpra noh namar ka jingpynkheiñ ïa ki kyndon ba la buh.
Ka kynhun Civic Body ka la pynpra ïa lai tylli ki ïing bad ar tylli ki ïing ba la buh ïa ki jaka die jaka thied ha Jain Colony ha Jassian Road, ïa 7 tylli ki dukan ba la shna ha ka surok Jassian bad ka ïing kaba don ha Kunj Vihar ha Jassian Road.
Ka MC Assistant Town Planner (ATP) ka Bedi ka la ong ba ka jingïoh jingtip ha kaba ïadei bad ka jingdon jong ki ïing kiba la shna beaiñ ka la long na ka jingleit khmih bniah kaba ju long man ka sngi jong ki heh ba dei khmih, bad hadien ba la lap ïa kane, ki bor ba dei khmih ki la phah pynpra noh ïa ki ing bad ki jingtei ba la shna beaiñ.
Kumba la bynrap halor kane, la ong ba ha ka taïew ba hashwa, ka jingpyntreikam pyrkhing ka la long pyrshah ïa ki jingshna kiba la shna beaiñ ha Ghumar Mandi, Model Town Extension, bad ha ïew Model Town Gol.
Ki heh ba dei khmih ki la pyntip shuh shuh da kaba ong ba kin sa ïai bteng ha ka ban pynlong ïa ka jingkhmih bniah bad ka jingleit pynpra ïa ki ïing ba la shna beaiñ bad ïaid lait na ki kyndon ba la buh ha ki sngi bad ki por ban wan ruh.
Na ka liang jong ka ATP Bedi ka la buh ka jingkyrpad ïa ki nongshong shnong ba ki la dei shwa ban pan jingbit bad ban khmih bniah bad ki heh jong ka Civic Body lada ki thmu ban shna ïing ne kiwei pat ki jingtei bad ban bud ïa ki kyndon ba la buh.
Ka la buh ïa ka jingmaham kaba pyrkhing ba yn sa pynshitom tyngeh lada lap ïa ki briew kiba pynkheiñ ïa ki kyndon ba la buh.
