Shillong, Rymphang 24:
U Myntri Rangbah ka ri India, u Narendra Modi, u la ïaid da ka kali naduh ka State Central Library haduh Khyndailad bad ruh ban kaweh kti kum ka dak ban pan jingkyrshan na ki paidbah nongshong shnong ka sor Shillong bad ka jylla baroh kawei ïa ka BJP na ka bynta ka ilekshon ka ban long ha ka 27 tarik mynta u bnai.
U Modi uba la poi ha Shillong mynta ka sngi ka 24 tarik Rymphang 2023, u la leit ïuhkjat nyngkong eh ha phyllaw ka State Central Library ban leit buh syntiew ïa ki lai ngut ki riewkhraw jong ka jylla; kita u Tirot Sing, u Kiang Nangbah bad u Pa Togan Sangma bad hadien kata u la ïeng hajrong kali ban kaweh kti ïa ki paidbah kiba la ïeng lypa harud surok haduh ban da poi ha Shillong.
La ïohi ruh ba ka Sorkar Jylla ryngkat ka Sorkar India ki la pynbit pynbiang haduh shi hajar ngut ki bor pahara ha kane ka jingwan ïuhkjat u Modi ha Shillong ban ïalap ilekshon ïa ki kyrtong ka BJP.
Haba u Modi u la kiew ha rynsan u la shong shiphang bad ïeng biang na jaka shong ban khot ïa ki paidbah kiba la shah khang lynti ha ki pulit bad mar kumta ki paidbah da ka jingkmen ki la weng hi ïa ki nar ba la ker da ki pulit ban tur hajan ka rynsan.
Hashwa ban kren u Modi la ïoh ka jingkren pdiang sngewbha na u President ka BJP, Bah Ernest Mawrie ha ka jingïadonlang u Bah Sanbor Shullai, Bah A.L Hek, Bah M Kharkrang bad kiwei ki kyrtong kiba la ap lypa ha rynsan.
Haba ai jingkren ha kane ka jingïalang u Modi u la ong haba u don ha Shillong u kynmaw beit ba ki nong Meghalaya ki dei kiba don shibun ka sap, ka jingriewspah ka riti ka dustur, ka jingitynnad ka mei mariang bad ka jingsngewtynnad ki sur jingrwai namar kane ka jaka ka dei ruh kaba ieid ïa ka jingïalehkai phutbol.
Nangta u la ong ba ka India ka la kiew bha ha ki kyrdan ba shaneng bad ka Meghalaya ruh ka la don bynta lang ban pynkiew ïa ka ri India.
Nalor kata, u la ong ba u syntiew ‘lotus’ u la ïai phuh kat dang mih ki sngi hapdeng ka jingkren beiñ kiwei ki seng saiñ pyrthei, hynrei ki paidbah ki kwah ïa ka sorkar jong u Modi bad ïa ka sorkar BJP ha Meghalaya.
U la pynpaw ruh ba ki paidbah ki dei ban kyntait mardor ïa ka saiñ pyrthei kaba la synshar tang shi ïing.
Hadien ba u la dep kren, u Modi u la kiew bha ban ïeng ha jingkhang ka kali ban kaweh kti biang sa shisien ïa ki paidbah.
Ha kajuh ka sngi u la leit sa sha Tura ban pan jingkyrshan na ki paidbah ka jylla ban jied ïa ka BJP ha kane ka ilekshon.
