New Delhi, Rymphang:
Ki dkhot jong ka Bharatiya Janata Party (BJP) ha Delhi, ki la pynlong ïa ka jingïakhih kaba heh habar jong ka shlem treikam ka Aam Aadmi Party’s (AAP) halor ka jingdawa ban phah hiar shuki noh ïa u Symbud Myntri Rangbha u Manish Sisodia halor ka jingshah kynnoh ba u la don bynta ban syntiat.
U heh nongïalam jong ka seng BJP ha Delhi u Virendra Sachdeva, ki MP kiba kynthup ïa u Parvesh Verma, Manoj Tiwari, u Myntri barim jong ka sorkar kmie u Vijay Goel ki la don bynta ha ka jingïakhih ryngkat ki nongbud jong ka seng BJP ha ryngkat ka jingdon jong ka kynhun pulit kaba la pynlong ïa ka jingpahara.
U Virendra Sachdeva bad u Manoj Tiwari ki la shahkem ha katei ka sngi ha ka por ba ki la ïashim bynta ha ka jingïakhih. Ka kynhun ba bun jong ki pulit ka la shah pyntreikam na ka bynta ban khang lynti ïa ki nongbud jong ka seng BJP ba kin leit sha ka jaka treikam jong ka seng AAP.
Ka kynhun ki pulit ka la pynkhlaiñ ïa ka jingpahara ha DDU Marg ha kaba ka jaka treikam ka don, ha kaba la don ruh ka jingbuh ar laiñ ïa ki jingker. Ki nongïakhih jong ka seng BJP ki la pyrshah bad ki la ong ba ki dei ban ïaid bad ban poi beit ha ka jaka ba ki thmu ban poi kata ha ka jaka treikam jong ka seng AAP. Kum u nongïalam ha ka lympung jingïakhih, u Virendra Sachdeva, ki MP jong ka seng kiba kynthup ïa u Manoj Tiwari bad u Parvesh Verma ki la pynshisha da kaba ong ba jingbuh ïa ka FBU (Feedback Unit) ka long ka jingma ïa ka shongshngaiñ jong ka ri.
U Sachdeva u la ong ba ka Feedback Unit beit beit ka ju ai jingtip sha u Myntri Rangbah u Arvind Kejriwal bad ka ju shah hukum ba la dei ban lum jingtip shaphang ki kynhun kiba pyrshah jong ka seng AAP, ki kynhun jong ki lad pathai khubor, ki jaka khaïi, napdeng kiba bun kiwei pat.
Ki nong ïakhih ki la pyrta da ki kyntien kiba pyrshah ïa u Sisodia bad dawa ba la dei ban weng noh ïa u kum u Symbud Myntri Rangbah. Kane ka jingïakhih jong ka seng BJP ka la long hadien ba ka sorkar kmie ka la pynshai ïa ka rukom ba la buh jingujor thymmai pyrshah ïa u Sisodia da kaba ai jingbit ban phah tohkit bniah ha ka kynhun CBI.
Ka Union Ministry of Home Affairs ha ka sngi Balang ka la pynshisha ha ka jaka treikam jong u Lt Governor ka Delhi ba ka la ai ïa ka rai ban phah tohkit ïa u Sisodia hapoh ka kyndon17 jong ka Prevention of Corruption Act, 1988. Na ka liang ka seng AAP ka la ong ba kane ka jingkynnoh pyrshah ïa u Sisodia ka dei ka bym don nongrim.
Ka kynhun CBI ka la ong ba ka la lap ïa kane na ka jingtohkit kaba hashwa ba ïa ka kynhun Feedback Unit (FBU), ba la buh da ka sorkar Delhi na ka bynta ban khmih bniah halor ka jingdon jong ka kam bamsap, ka la shah pynshisha ba ka la khmih bniah ha ki kam ba ïadei bad ki kam saiñ pyrthei. Ka kynhun tohkit ka la ai jingmut ba la dei ban buh da ka jingujor ejahar pyrshah ïa u Sisodia.
