Mawkyrwat, Rymphang 24:
Da ki hajar ngut ki paidbah nongkyrshan ka TMC Mawkyrwat Block ki pdiang sngewbha ha ka sngi Thohdieng ïa ka nongïalam ka TMC kaba dei ruh ka MP Lok Sabha ka Mahua Moitra ha Mawkyrwat ha ryngkat ka jingdonlang u Bah Sounder Strong Cajee uba dei u kyrtong ka TMC na Mawkyrwat konstitwensi.
Ha kane ka sngi, ha shuwa ka jingïalang paidbah, ka la don ruh ka jingïaid da ki thuk thuk ryngkat ki kali naduh shlem treikam ka seng shaduh Madan Saitsnad, Mawlangwir.
Ka Moitra haba ai jingkren, ka la ther tyngeh ïa u Amit Shah, u Myntri korbar ri ka Sorkar Pdeng halor ka jingkynthoh jong u ba ka jylla Meghalaya ka dei ka jylla kaba bamsap tam.
“Nga kwah ban kylli ïa u Amit Shah, mano ba ïalam ïa ka Sorkar ha ka jylla, hato ym dei ka BJP, NPP bad ka UDP kiba la synshar mynta la 5 snem?” la buh jingkylli ka Moitra.
Haba ther shuh shuh, ka Moitra ka la ong, “Phi keiñ phi dei kiba bamsap tam namar phim shym la leh ei ei baroh san snem, phim shym la pynbiang ïa ki lynti ki syngkien, ki jaka sumar bad ki jaka pule kiba biang.”
Ka Moitra ka la ong ba ka BJP bad ka NPP ki ïaleh drama ïa u paidbah mynta, bad ki ïa kynnoh iwei ïa iwei, hynrei ki dei hi kijuh, bad ki ïa bamja na kajuh ka pliang.
Ka la kynthoh jur ruh ïa ka Congress ba kane ka seng saiñ pyrthei kam shym la lah ha ka jingïakhun pyrshah ïa ka BJP bad na kata ka daw, ka sa mih ka TMC da kaba kam ruh ba dei sa tang ka TMC kaba nud ban ïa pynibor bad ka BJP.
Ka la kynthoh jur ruh ïa ka NPP ba ka khlem leh eiei ha kine ki san snem, da kaba kylli, kumno kam lehraiñ, ha ka jingshisha, ka la dei ban rieh noh ïalade bad sa mih pyrthei pat hadien 10 snem.
Kumta ka Moitra ka la kyntu ïa ki paidbah ka Mawkyrwat konstitwensi ba kim dei ban shah pynbiej shuh ha kane ka kynti kumba ki la mad ïa ka jingsynshar jong kiwei ki seng naduh ka Congress, BJP, NPP bad ki seng riewlum. Kane ka MP na West Bengal ka la kyrpad ruh ba mynta ka kynti, ki paidbah ki dei ban ai noh ka jingkyrshan ïa ka TMC da kaba kular ruh ba lada ki paidbah kin pynjop, kan shimkhia ban warah ïa ka roi ka kiew ha kane ka konstitwensi.
