Rymphang:
Ka jingïalap ilekshon ki seng saiñ pyrthei bad ki kyrtong kiba ïakhun ïa ka ilekshon sha ka Ïingdorbar Thawaiñ kaba khatwei ka jylla ka la poi artad sha kaba kut. Ki kyrtong ki la leit kylleng ki jaka ha kine ki 37 sngi naduh ba la pynbna ïa ka ilekshon ha ka 18 tarik Kyllalyngkot, 2023, na ka bynta ban pynsngew ïa la ka nongrim bad ki mat treikam kiba ki don ban tyrwa sha ki paidbah. Don ki kyrtong kiba pynsngew ïa ki mat treikam kiba ki la dep pynkhreh shimet-shimet, bad ki don pat kiba pynsngew ïa ki kular ilekshon bad ki mat treikam kiba la pynkhreh da ka seng kaba ki ïeng ban ïakhun ïa ka ilekshon.
Kaba kham shongshit bad kham pynkhluit ïa ki paidbah ha ka ilekshon ka dei ka jingïakynnoh bad kynthoh markylliang ki seng saiñ pyrthei halor kiba bun ki mat kiba ktah ïa ki paidbah. Don ki nongkren kiba tbit bad kiba nang bha ban pynshai pynsngew ïa ki paidbah ha ki ai jingkren bad ka jingkren jong ki ka rung ha ka jingmut jingpyrkhat jong ki nongsngap. Hynrei ki don pat ki nongkren kiba kren ruma khlem sngewthuh ïa ka phang. Ka don lei lei kawei ka jingkren ïalap ilekshon ha kine ki sngi ha kaba la poi shaduh u pud ban smai hakhmat u paidbah ban shong samla sah shirta lada ki paidbah ki pynjop ïa kawei pat ka seng ka bym dei ka seng riewlum. Ka jingïalap ilekshon ka dei ban long kaba don nongrim namar kaei kaba ki kdew lyngba ki mat treikam, ka dei na ka bynta san snem, la ka dei ha la kajong ka konstitwensi ne ha ka Jylla baroh kawei.
Lada peit na ka rukom tuid ki paidbah sha ki jingïalang ïalap ilekshon, bad ka jingshongshit khlehbiej jong ki, kham duna kiba pynleit jingmut ïa kaei kaba ki kyrtong bad kiwei ki nongai jingkren ki ïalap ha ka jingïalang. Ki seng saiñ pyrthei ki don la ki jong ki mat kular ilekshon (election manifesto) kiba ki la pyllait paidbah. Ki paidbah ki donkam ban tip kiba kumno kita ki mat treikam ba ki seng saiñ pyrthei ki don na ka bynta ban saiñdur ïa ka Jylla ha baroh ki liang. Hynrei ka jingshong shit jong ki paidbah ha ka por ilekshon kumba ka paw, kam da dei eh ba ki kmen ne sngewtynnat ïa ki mat treikam kiba la pynsngew da ki seng saiñ pyrthei ne da ki kyrtong. La ïohi ba ka jingshongshit ka dei namarba haba ki leit sha ka jingïalang ilekshon ki khmih lynti ban ïoh ei lut nadong shadong naduh ka bai sngi, bai kali, bai bam, khamtam haba ki don ki kyrtong bad ki seng kiba pyndonkam da ka pisa.
Ka ilekshon ka dei ka tamasa synshar paidbah kaba ju pynlong da ka Election Commission ka ri India na ka bynta ban jied ïa ki nongthaw aiñ. Ka 27 tarik Rymphang, 2023 ka dei ka sngi ba ki paidbah ka Jylla kin rai ïano bad kiba kumno ki briew kin leit sha ka Ïingdorbar Thawaiñ bad ka lawei kaba shngaiñ ka don ha ka kti jong ki nongjied lada ki jied ïa ki nongmihkhmat da ka jingkitkhlieh. Ngeit skhem ba kaei kaba ki seng saiñ pyrthei bad ki kyrtong ki la dep ban pynsngew lyngba ki rynsan ïalap ilekshon ha kylleng ki konstitwensi kan long ka jingmyntoi ïa ki paidbah kumno ban jied ïa ki briew kiba dei ban long ki nongïasaid ïa ki jingeh ba ki paidbah ki mad bad kiba shemphang ban thaw ki lad ki lynti ban weng ïa ki jingeh ha kane ka Jylla.
