Shillong, Rymphang 24:
Ka jingïalap ilekshon ha baroh 59 tylli ki konstitwensi ha kane ka Jylla kan kut noh mynta ka sngi (Sngi Saitjaiñ) ha ka por 4 baje janmiet, kaba long 48 kynta sha ka jingthep vote na ka bynta ban jied ïa ki dkhot ka Ïingdorbar Thawaiñ kaba khatwei jong ka Jylla.
Ha ka por 4 baje janmiet jong ka 25 tarik Rymphang (Sngi Saitjaiñ) ka dei ka jingpynkut ïalap ilekshon, kaba long 48 kynta haduh ban da pynkut ïa ka por thep vote, kata haduh ka 4 baje janmiet jong ka 27 tarik Rymphang (Sngi Nyngkong).
Ka jingthep vote kan nym long shuh ha Sohïong konstitwensi ha ka 27 tarik mynta u Rymphang hadien ka jingkhlad noh u kyrtong ka United Democratic Party u Bah HDR Lyngdoh, hynrei kan ïaid beit ha baroh 59 tylli ki konstitwensi.
Kumta, khnang ban khanglad ïa ka jingpynkheiñ kyndon ïalap ilekshon, na ka liang ki bor pynïaid ilekshon ha kane ka Jylla ki la hukum lyngba ki District Election Officer (DEO) ïa baroh ba ym dei ban don kano kano ka jingïalap ilekshon ha kano kano ka konstitwensi hadien ba la kut ka por ïalap ilekshon, kata hadien ka 4 baje janmiet.
La bthah ba ki nongkitkam jong ki seng saiñ pyrthei, ki nongwan jingïalang ilekshon, bad ki nongai jingkren ha ki jingïalang ïalap ilekshon kiba la wanrah nabar konstitwensi bad ki bym dei ki nongthep vote hapoh ka konstitwensi ki dei ban mih noh shisyndon na ka konstitwensi tang shu kut ka por ïalap ilekshon ha ka por 4 baje janmiet.
Baroh ki seng saiñ pyrthei ki la pynjur bha ïa ka jingïalap ilekshon bad ki don ki seng saiñ pyrthei ki bym dei na Meghalaya, kiba la wan ïalam da ki nongïalam jong ki kiba na kiwei pat ki Jylla kum ka BJP, Congress, bad TMC.
Ka Congress ka la wan ïalam ïa u Rahul Gandhi bad ka TMC ka la wan ïalam ïa ka nongïalam kaba hehduh kaba dei ruh ka Myntri Rangbah ka West Bengal ka Mamata Banerjee, nalor kiwei kiwei ki MP jong ka TMC kum ka Mahua Moitra, katba ka BJP ka la wan ïalam ïa u Myntri Rangbahduh ka Ri, u Narendra Modi, u Myntri Korbar Ri u Amit Shah bad kiwei kiwei.
