Shillong, Rymphang 24:
U kyrtong ka VPP na North Shillong Constituency, u Bah Adelbert Nongrum u la phla ba um shym la leit ïuhkjat ha Them Ïew Mawlong namar u kwah ïa ka vote, hynrei ban die pat ïa ka longdien, namar ki dei ban tip mano ba dei trai ïing bad mano ba dei nongshong wai.
Ïa kine ki kyntien u Bah Adelbert u la pynpaw haba ai jingkren ha ka jingïalap ilekshon ba khatduh kaba la long ha YMCA Mawkhar ha ka janmiet 24 tarik Rymphang 2023. Ha kane ka jingïalang palat spah ngut ki nongkyrshan u ‘prah’ ki la wan ban sngap ïa kaei ba ki nongïalam jong ka VVP ki don ban pynsngew.
Haba ai jingkren ha kane ka jingïalang, u Bah Adelbert u la ong ka jingkhlaiñ kam shong ha ka jingbun paidbah, hynrei lada dei tang ar ngut ruh yn pynkhih win ïa ka jylla baroh kawei.
“Ki ong ïa ngi, ngin leh aïu lada jop ka VPP tang khyndiat ngut, hynrei nga ong phi pat ba la synshar haduh sanphew wei snem phi la leh aïu ïa ka jaidbynriew jong ngi haba ki bun paid, hynrei phi khlem shna ïa ki aiñ phi dei ki nongshna tang pisa” u la ong.
“Ki kynnoh ïa nga ba nga ïam bait, ba nga lung mynsiem, nga hap ban ïam na ka bynta ka pateng ban wan. Hato ban lung mynsiem ka long pop seh, katba shabar pat ki leh ïa ki kam tuh kam thok suda, hynrei nga ong ïa phi ki paidbah lada ki ai pisa shim beit tangba ha ka 27 tarik mynta u bnai thep vote ha ka shap u prah” u la ong.
