Kyiv, Ryphang:
Katkum ki khubor la ong ba ki paidbah nongshong shnong ka ri Ukraine, ha ka Sngi Thohdieng kin pynlong jingduwai kyrpang na ka bynta ka ri bad ka suk ka saiñ hapoh ka ri. Ha kane ka sngi, kaba dei ruh ka sngi ba la buh jingkynmaw ia ka jingdap shi snem ka jingleit hiar thma jong ka Russia pyrshah ia ka Ukraine.
Ha katei ka sngi la ong ba u President ka Ukraine, u Volodymyr Zelensky u la ai mynsiem ia ki paidbah nongshong shnong ka ri da kaba ong ba ka Ukraine ka long ka nongjop ha katei ka thma bad kane ka long ruh wat hadien ba ka Russia ka la byrngem tyngeh ba kan ther da ki ‘namding kiba kham khlaiñ shuh shuh ban ia kiba ka la ju pyndonkam baroh shi katta ki bnai naduh u snem ba la leit.
Ha u snem ba la leit, ha katei hi ka sngi (24 tarik u Rymphang), u President ka Russia u Vladimir Putin, u la pynkyndit ia ka pyrthei baroh kawei da kaba phah ia ki shipai ka Russia ban rung sha Ukraine bad ban leit hiar thma kyndit- kyndit khlem kano kano ka dak ne ka jingmaham lypa halor katei ka jingthmu hiar thma jong u ia ka Ukraine.
Kumta la ong ba ha katei ka Sngi Thohdieng, u President ka Ukraine, u Volodymyr Zelensky u la ai jingkren halor ka lanot ba ka Ukraine ka hap ban kit bad ioh mad ha kane ka por tang namar ka mynsiem dusmon jong ka Russia.
Kawei na kitei ki jingkynmaw ia ka jingdap shi snem ka thma, la pynlong hapoh ka shnong Bucha, kaba long ka shnong kaba la mad bha ia ki kam thombor jong ka Russia. Dei ha katei ruh ka shnong ba ki nongialam niam ki la pynlong jingduwai kyrpang naka bynta ka shongsuk- shongsaiñ hapoh ka ri bad ba kiei- kiei kin iaid beit- iaid ryntih noh kumba ka dei ban long.
Ha katei ka sngi, u Zelensky u la ong ba u mynsiem bymman u dang don bad dang treikam wat haduh kine ki sngi ba mynta, bad ka thma kaba jur ruh ka dang ap ia ka ri Ukraine. Hynrei, u la ong ba ka Ukraine ka tip shai ba ha kaba kut katei ka thma kan kut ha ka kti ka jingjop jong ka Ukraine.
Kumjuh ruh na ka liang ka tnat iada ri jong ka Ukraine, ka la maham lypa ia ka dak ka jingbym shngaiñ ba ka Russia ka lah ban ther ‘namding biang ha kum kane ka por.
La ong ruh ba ki ri bapher jong ka thaiñ West, kiba la ju ai jingkyrshan naduh ka pisa haduh ki tiar iakhun thma na ka por sha ka por hapdeng ka jingiakhun thma jong ka Ukraine pyrshah ia ka Russia, kitei ki ri ruh ki la rakhe bad kynmaw ia ka jingdap shi snem jong ka jingleit hiar thma ka Russia sha Ukraine bad kaba long ruh ka jingïakynad kaba jur bad kaba heh tam eh hapoh ka dew bah Europe ha kane ka juk ba mynta naduh ki por ba la khie ka Thma Bah ba Ar.
Kumjuh ruh na ka liang ka United States bad kiwei pat ki dkhot jong ka kynhun G7, ki dang thmu ban pynngat kyndon thymmai shuh shuh ia ka Russia halor ka jingbym sangeh jongka ia katei ka thma ba khlem nongrim.
Kumta la ong ba ha ka Sngi Palei, ka United Nations ruh ka la pynpaw ia ka jingdawa kaba jur ba ka Russia ka dei ban phah mih noh shi syndon ia kitei ki shipai jong ka kiba dang don hapoh Ukraine tad haduh kane ka kynti ba mynta bad ruh ba ka dei ban sangeh bad pynkut noh shi syndon ia katei ka thma.
