Mahendraganj, Rymphang 24:
Haba ban jur halor ka bor jong ka synshar paidbah ban weng ïa ki nongïalam ba bamsap, u nongïalam ka TMC Legislature Party, Dr. Mukul Sangma ha ka Sngi Thohdieng u la ong ba ki paidbah ka Jylla ki dei ban pyntikna ba ki jied ïa ka Sorkar Jylla kaba trei na bynta jong ki ha ka jaka ban bud tdong ïa la ki kynrad ha Delhi.
Haba ai jingkren sha ki paidbah nongkyrshan ha Mahendraganj ha ka Sngi Thohdieng, u Dr. Sangma u la ong, “Ha ka 6 tarik u Lber, 2018, nga la kut noh ka jinglong Myntri Rangbah. Ki nongïalam ka BJP na Delhi ki wan sha Meghalaya bad thung ïa u Myntri Rangbah u bym shym la shah jied na kano-kano ka konstitwensi ha katei ka por. Tang hadien ba u la long Myntri Rangbah, u la long MLA. Kane ka pyni ba ngim shym la jied ïa kane ka Sorkar Jylla, la leh da ki nongïalam na Delhi. Kam shym dei ka rai jong u paidbah ka Jylla hynrei da ka bor.”
U Dr. Sangma u la ong, “Wat jied tang ki MLA [ha kane ka kynti], jied ïa ka Sorkar. Ki briew ki dei ban ‘vote’ ïa ka Sorkar kaba trei na bynta ki paidbah bad shakri ïa ki. Ka jingthmu jong ka saiñ pyrthei ka long ban trei na bynta ka bha ka miat jong ki paidbah ha baroh ki liang. Ka saiñ pyrthei ka dei ka atiar kaba ngi lah ban pynjem ïa ki jingeh jong ki paidbah.”
U la kular ruh ba kane ka Sorkar kan pyntikna ïa ka suk ka saiñ bad ka roi ka par jong ka Jylla.
“Ngin wanrah biang ïa ka suk ka saiñ ha ka Jylla wat hapdeng ki jingtynjuh kiba ap ha ka kyrteng jong ka shong suk shong shngaiñ. Ngin pynurlong ïa ki 10 kular ka TMC na bynta ka Jylla, pynbiang ïa ka jingkyrshan pisa sha ki kynthei jong ngi bad ki samla bad wanrah 3 lak tylli ki kam,” u la ong.
Haba pynsngew halor ki jingkynnoh bamsap bad jingpynbudnam kiba la wan jia naduh ba ka Sorkar MDA ka wan ha ka bor, u Dr. Sangma u la ong ba tang ka TMC kan pyllait ïa ka Jylla na ka bamsap.
“Kito kiba lalot, kim tip jingkut ban pyndap la ki pla ha ka jaka ban trei bad kyntiew ïa ki paidbah. Lada mynta ka sngi, ka Meghalaya ka dei ka Jylla kaba bamsap tam, kam dei namar ki paidbah. Ka dei namar jong kito kiba don ha ka bor. Namarkata ka long kaba kongsan ban pyndonkam ïa ka hok jong ngi ban ‘vote’ ha kane ka ilekshon,” u la ong.
Shuh shuh utei u nongïalam ka liang pyrshah u la bynrap, “Ka sur jong ngi ka dei ka atiar bad nga la pyndonkam ïa ka na bynta ki paidbah. Ngi donkam ban ïakhun ban pyllait ïa u duk u suk na ki jingeh jong ki bad ban pynurlong ïa ki jingangnud jong ki khun samla. Kine ki dei ki kamram jong ka Sorkar Jylla.”
