Shillong, Rymphang 24:
U MLA barim ka Nongkrem u Bah Ardent Miller Basaïawmoit uba dei ruh u nongïalam bad u kyrtong ka Voice of the People Party (VPP), u la ong ba ka daw ba la seng ïa katei ka seng thymmai ka dei namar ba baroh ki seng saiñ pyrthei kiba la don ha kane ka jylla ki la pulom lut. Nalor kata, u la pynshai ruh ym pat myntoi ban kren ei ei ïa ka Trinamool Congress (TMC), ka seng saiñ pyrthei kaba dang shu wan, hynrei dei ban kren ïa kine ki seng kiba la synshar ha kine ki san snem.
Ïa kitei ki kyntien u Bah Ardent u la kren ha ka jingïalang ïalap ilekshon ha ka janmiet sngi Thohdieng ha Mawkhar na ka bynta ban pan jingkyrshan na ki paidbah ka North Shillong konstitwensi ban pynjop ïa u kyrtong ka seng, u Bah Adelbert Nongrum u ban ïakhun ha kane ka ilekshon MLA ka ban sa long ha ka 27 tarik mynta u bnai.
“Kine ki seng saiñ pyrthei kiba don ha kane ka jylla ka jong ngi baroh ki la pulom bad kim shym la lah ban ai ïa ka jingshakri kaba hun bad ka ban pynhun ïa u paid nongshong shnong. Kim shym la lah ban kyntiew ïa ka ïoh ka kot hapdeng ki nongshong shnong jong ngi, kim shym la lah ban ai ka jingshngaiñ ïa ka Jaitbynriew ka jong ngi, kim shym la lah ban sumar ïa kane ka ri ka baieid eh ka jong ngi, dei namar kata ka daw ngi la seng ïa ka VPP,” la ong u Bah Ardent.
U Bah Ardent u la ong ba ki la don ki briew kiba pynsngewthuh bakla ba ka VPP kam ju kren ne kynthoh ei ei ïa ka Trinamool Congress (TMC), hynrei u la ong ba ym myntoi ban pynlut ïa ka por ban kren eiei shaphang ka TMC kaba dang shu wanpoi bad ïa ka TMC, ym pat kheiñ ha kane ka jylla.
“Ngi kwah ban ïakren ïa kine ki seng saiñ pyrthei kiba la synshar ïa ngi khamtam ha kine ki san tylli ki snem”, la ong u Bah Ardent.
U Bah Ardent u la ong ba lada ki paidbah ka jylla kin dang ïai jied ïa ka pisa, kata ka mut ka ri kan nang ngam, bad u la ong ba lada ki paidbah ki ailad ïa ka VPP ha kane ka kynti kaba mynta, ka VPP kan khyllie ïa ka T.816 klur kaba ka Sorkar Meghalaya Democratic Alliance (MDA) ka la ai ïa ka jingkheiñ ba ka la pynlut ban ïakhun ïa ka khlam Covid-19 hapoh ka jylla.
Na ka liang u Bah Ardent u la pynkynmaw bad batai ruh ïa ki daw ba ka jylla Meghalaya ka mad shibun ki jingeh bad ki paidbah ruh ki hap ban shah, bad ïakhun shibun ki jingïaleh na ka daw ba ki nongïalam kiba kum u Bah Prestone Tynsong u ba dei u Symbud Myntri Rangbah ka jylla bad u ba dei na ka National People’s Party (NPP), u la ong ba kum ki nongïalam ki pynbiej laiphew jait ïa ki nongthep vote bad ki nongthep vote ruh ki ngop man la ka san snem.
Ha katei ka sngi, la ïoh ruh ka jingkren na kyrtong u Bah Adelbert Nongrum, u Mayborn Lyngdoh uba dei u kyrtong na Pynthorumkhrah \konstitwensi bad na kiwei kiwei ki nongïalam.
