Bengaluru, Rymphang:
Ha kane ka kynti, la ong ba hapoh jong katei ka jingialang G20 kaba heh, ki nongialam jong kitei ki ri ki ban shong jingialang ha katei ka sngi, kin ia pyrkhat bad puson bad kin buh peit thuh thik pa thik ruh halor ka jingduh nong bad ka jinghiar ka ioh ka kot jong ka Ukraine ha une u snem ba la leit tad haduh kane ka kynti namar ka jingleit hiar thma dusmon jong ka Russia naduh u snem ba la leit.
Katei ka jingialang G20 jong ki Myntri ka tnat pla tyngka bad ki Lat jong ka Central Bank jong kitei ki ri bapher ia ka ban la pynlong hapoh Bengaluru, ka long ruh hadien ba la iohi ba ka la don ka jingmyntoi na ka jingialang G20 ba la pynlong ha u Risaw jong u snem ba la leit, haba iadei bad ka jing ia pyrkhat kam ban tehlakam ia ka jingkiew dor ki mar- ki mata namar ka thma ha Ukraine kaba la jia naduh u Rymphang jong u snem 2022 ba la leit.
Kumjuh ruh ka Treasury Secretary jong ka United States, ka Janet Yellen ha ka Sngi Palei ka la pynpaw ia ka jingmyntoi kaba la mih na katei ka jingialang kaba la dep ban pynlong ha ki khyndiat bnai ba la leit bad kumta ruh ka la ong ba ka jinglong jingman ha kane ka por ka la kham biang arshah ban ia kaei kaba ki la mutdur ha kitei ki por ba la leit.
Kumta ruh ka Yellen ka la ïaroh ia katei ka jinglah jong ki Sorkar bad ki Central Bank jong baroh ki ri kiba hap hapoh ka G20 ha une u snem ba la leit, ha kaba ki la lah ban tehlakam ia ka jingkiew dor ha utei u snem.
Namar kumba la iohi ia ka jinglong jingman ha kane ka kynti, la shem ba ka jingkiew dor hapoh United States bad ha kiwei de ki ri ka la sdang ban kham hiar, hynrei ka Yellen ka la kyntu pat ba ym dei ban shu kheiñ sting ne shim sting noh haba la iohi ia ka jingmyntoi bad jingsei soh, bad kumta ruh ka la ong ba kitei ki ri ki dang dei hi ban trei shitom kham bha shuh shuh, khnang ban nang lah ban kham pynbha shuh shuh ia ka jinglong jingman ha ki sngi ki ban wan.
Shuh shuh ruh la ong ba ka Yellen bad kiwei de ki myntri jong ka kynhun G7 ha katei ka Sngi Palei, ki la pynpaw ia ka jingdonkam ban pynmih pisa naka bynta ka Ukraine bad ki la kular ruh ban nang pynjur ia ki kyndon bad jingpyrkhing pyrshah ia ka Russia namar ka jingleit hiar thma ba khlem kut trai jong ka pyrshah ia ka ri Ukraine ka bym pat da biang wat ia ki tiar iakhun.
Kumjuh ruh na ka liang ki nongialam ka Japan hapoh jong katei ka kynhun G7, ki la ong ba katei ka kynhun kan ialeh ban peit thuh ia ki jingmyntoi bad jingtreikam, na ka jingbuh kyndon pyrshah ia ka Russia bad lah ruh ban leh eiei shuh shuh lada kim pat ibiang lane kim pat ikop treikam bha.
Ha kajuh ka por ruh na ka liang ka Germany pat, ki nongialam ka Germany ki la ong ba ka long kaba donkam ban ai tyngeh ia ka Russia khnang ba kan pei phang noh bad lada kam i-patiaw satia, dei ban pynsah marwei ia ka, khnang ba kan sngewthuh ia ka jinghiar ka ioh ka kot jongka kumba ka la leh ia ka Ukraine.
Katba na ka liang jong ka India, la ong ba kam shym kwah ban poi sha katei ka mat ne ban shim rai la kan ai jingkyrshan ne kan pynsah marwei ia ka Russia namar dei tang ka Russia hi ba ka India ruh ka ju shaniah ha baroh shi katta ki snem ba la leit bad bun na ki tiar thma bad ki liengsuiñ thma kiba ka India ka don ruh ki dei hi ki jong ka Russia bad kiba ka la ioh na ka Russia. Kumta ka India tad haduh mynta- mynne, ka dang neh hi, ha kajuh ka rai ban ym iashah liang shano shano ruh khnang ba ka jingiadei jongka bad ka Russia ne bad kiwei ki ri jong ka pyrthei ruh, kan ym dkut ne pulom noh.
Haba iadei pat bad ka jingleit hiar thma jong ka Russia ia ka Ukraine, ka Russia ka la ong ba kane kam dei ka thma, hynrei ka dei tang ka ‘Special Military Operation’.
