Washington, Rymphang:
Katkum ki khubor la ong ba u Secretary of State jong ka United States, u Antony Blinken un sa wan ban jurip sha India ha ka taiew ban wan naka bynta ban ïashim bynta ha ka jingialang G20 jong ki nongialam ki ri bapher bad ban wan iakynduh ruh ia ki heh ka India kum shi bynta ban pynpaw ia ka jingiadei kaba skhem hapdeng ka United States bad ka India.
Ka India ka la ioh bat ia ka jinglong President ha ka G20 dei naduh ka 1 tarik jong u Nohprah ha u snem 2022 ba la leit.
Kumta la ong ba ha ka 1 tarik jong u Lber ban wan, u Blinken un leit hiar sha New Delhi ban ïashim bynta ha katei ka jingialang G20 jong ki Myntri ka tnat kam bar ri jong kitei ki ri bapher kiba long ki dkhot jong katei ka kynhun G20. Ka mat ba kin ïakren ha katei ka jingialang, kan long ban pyntikna halor ka jingshngaiñ jong ka bam- ka dih, ka bor ding, ka jingjur ki kam khaïi droks, ka jingdonkam ban kyntiew ia ka rukom ai jingsumar haba iadei bad ka koit ka khiah hapoh ka ri, ki lad jingïarap haba jia kano kano ka lanot ha ka por bym lah ban tip bad kumjuh ruh ka jing pyn iaryngkat dor ia ki kynthei bad shynrang bad kumjuh ruh ban ai bor ia ki kynthei ba kin don bynta ha ki liang bapher khnang ba kin lah ban ïeng ha la ki jong ki kjat bad ba kin long ruh ki nongiada na ka bynta kiwei pat kiba donkam ia ka jingkyrshan.
Kumta ruh la ong ba utei u nongialam ka United States un don ha India tad haduh ka 3 tarik jong u Lber.
Shuh shuh ruh la ong ba u Blinken ha kane ka kynti un sa wan sha India hadien ka jingleit jurip jong u sha ki 2 tylli ki ri jong ka thaiñ Central Asia, na Kazakhstan bad Uzbekistan, ka ban sdang naduh ka 28 tarik jong une u Rymphang.
Ha ka 28 tarik u Rymphang, u Blinken un leit ban jurip sha Astana jong ka Kazakhstan, ha kaba un leit ban kynduh ia ki heh jong ka Kazakh ban pynkhlaiñ ia ka jingiadei hapdeng ka US bad kitei ki ri.
Hadien kata pat un sa leit ban jurip sha Tashkent jong ka Uzbekistan, ha kaba un leit ban kynduh bad ïakren kam bad ki heh ka Uzbekistan bad hangtei ruh un ïakren- ia pynbeit kam badki kum shi bynta ban pynkhlaiñ ia ka jingiadei hapdeng ka US bad katei ka ri.
