Patna, Rymphang:
Kum shi bynta ban pynkhreh halor ki jingpyntreikam na ka bynta ka jingïakhun ïa ka ilekshon Lok Sabha 2024, ka seng BJP ka la bthah ïa ki jaka treikam bad ïa ki nongbud jong ka ba ki la dei ban pynsngewthuh shai sha ki paidbah halor ki skhim ai jingmyntoi ha ka jylla.
Kumba la pynpaw hashwa, la ong ba ka seng BJP ka la don jingthmu ban ïakhun bad kyrmen ban jop ha ki 36 tylli ki konstitwensi na ki 40 tylli ha Bihar.
Ka seng halor kane ka jingthmu ka la pynlong ïa ki jingïalang na ka bynta ban ïamir jingmut halor ki jingpynkhreh na ka bynta ban lah ban pynurlong ïa ki jingthmu ba la buh ha ka ‘Mission-26’ ba la buh thong ban lah ban pyntreikam kumba la thmu da ka seng.
Ha kawei pat ka liang, u President jong ka seng BJP ha ka jylla u Sanjay Jaiswal u la ong ba u Nitish um don bynta ei ei shuh ha ka jylla bad ha ki kam saiñ pyrthei ha ka ri.
U la ong ba ka la don ka daw namar ba u Myntri Rangbah jong ka Telangana u KC Rao um shym khot ïa u Nitish sha ka jingïalang kaba la long ha ka jylla jong u naba u la khot la wer ïa kiwei pat ki Myntri Rangbah ha ka prokram jong ka jingïatylli jong ki seng ka liang pyrshah.
U Jaiswal u la pynshisha da kaba ong ba ka seng BJP kan sa ïoh ïa ka jingjop ha ki 36 tylli ki konstitwensi na ki 40 tylli ki konstitwensi jong ka Lok Sabha da ka jingïakhun hi ha ka General Election ka ban sa long ha u snem ban wan kata ha u 2024.
Ha kaba ïadei bad kane, u la ong ba ka seng ka la ïoh ban pdiang ïa shibun ki jingkynthoh na ki nongbud jong ka seng shaphang ka jingtlot jong ka ha ki 10 tylli ki konstitwensi.
“Ka seng kan sa khmih bniah kham bha ha kine ki konstitwensi. La dep ban ithuh lypa ïa ki konstitwensi kiba tlot,” u la bynrap. Kumba la ïathuh ka tyllong khubor, la ong ba ki jingpyntreikam jong ka seng BJP kim shym la khlaiñ bha ha Kishanganj, Gaya, Nawada, Katihar, Munger, Purnia, Vaishali, Jhanjharpur, Valmikinagar, Gopalganj bad Karakat kiba dei ki Lok Sabha konstitwensi ha ki ilekshon ba la dep.
Kum ban shu pynkynmaw, la ong ba ka seng ka la dep ban sdang ha kaba ïadei bad ki jingpyntreikam kum shi bynta ban pynkhreh bha ha ki konstitwensi hashwa ban pynlong ïa ka ilekshon.
