Shillong, Rymphang 26:
Ka jaka thep vote kaba don tang khyndiat ngut ki nongthep vote ka dei ka Kamsing. Kane ka shnong ka don ha Amlarem konstitwensi ha West Jaiñtia Hills district.
Ha kane ka jaka thep vote ki don tang 35 ngut ki nongthep vote, bad ki nongpynïaid ilekshon kin hap ban shong da ka lieng ban jam ïa ka wah sha shiliang ban poi sha kane ka shnong.
Napdeng ki 60 tylli ki konstitwensi, ka Mawlai konstitwensi ka dei kaba heh tam kaba don haduh 50,058 ngut ki nongthep vote, 23,144 ngut ki shynrang bad 26,914 ngut ki kynthei.
Ka Dalu konstitwensi ka dei kaba duna tam ki nongthep vote da ka jingdon tang 22,099 ngut ba kynthup 10,982 ngut ki shynrang bad 11,117 ngut ki kynthei.
Ki don 74 tylli ki jaka thep vote ha ki shnong ki bym pat ïoh surok kat haduh mynta, bad 2 tylli ki jaka thep vote ki dei kiba hap jam ïa ka wah.
Ha South Garo Hills district, ka don ka jaka thep vote ha ka shnong Rongcheng ha kaba ki nongpynïaid ilekshon ki hap ïaid kjat 8 km ban poi sha ka jaka ba don surok.
Nalor ka Rongcheng, ka don ka jaka thep vote ha Nongnam kaba hap ha Mawkyrwat konstitwensi ha kaba ki nongpynïaid ilekshon ki hap ïaid kjat 4 kynta.
