U Sumar Sing Sawian
Kine ki long ki sngi ki por, kiba pynkulmar, pyngking khlieh ia ki jingmut jong u luk u lak, khamtam kito kiba la dei ka rta ban ia shim bynta ha ka jingiajied ia ki nongmihkhhmat sha ka Dorbar Thaw Ain ka jylla, District Council bad kumta ter ter. Ki nongialeh ne ia pyni dohksah ki dei kito kiba na ki seng hima sima kiba pher bad don ruh ki riew shimet, bad don ruh kito ki bym ju ia mad ia kum kine ki kam bad ba ka long ka sin kaba nyngkong eh ia ki. Kumta ha kawei ka liang ki don ruh kito kiba la thong da ka spah ka phew jong ki, bam pyni sha ka pyrthei ia ka jingdon ka jingem ka jong kito, kiba pyni bad thad tyngkrein ia la ka spah ka phew.
Ka jingia tan tyllai ne jingiakhun ka long ka seng synshar ka bat ia ka synshar ka khadar, kata ka BJP. Ki jingkular ki jong ka long khamtam ia ki nongrep nong-riang, ban pynioh ia ki symbai jingthung jingtep, kum u khaw, u kba, u kew, ki jhur ki jhep bad kiwei kiwei de ki jingthung. U nongialam ka BJP, u Narendra Modi, uba long ruh ha kajuh ka por u Myntri Rangbah Duh ka Ri India, u la kren ruh shaphang ka jingkyntiew ia ki samla samhoi, ha ki jingpule kot pule sla, bad ruh ka jing-iohkam ioh jam ha ka treikam jingktah ka jong ki. Ka la don ruh ka jingkular ban pynioh ei ia u khaw, u kew, ka umphniang bam, ka shini, ka mluh.Kum kita baroh ki long ki jingkular ha kane ka jingialeh ka BJP, ha ka bor synshar ha ka kti ka jong ka.
Kumta, ka jingiakhun bad jingiaksaid, ka dang iaid ruh napoh napoh babd ruh ha man la ki jingkhang jong ki iing ki sem, ha ki jaka sor bad ruh ki nongkyndong.
Kane baroh ka la long ka tamasa jong ka jingiatan tyllai jong kiba ia kwah ia ka bor synshar khadar. Katba nang ioh ia ka bor synshar halor kiwei, katta, ka la nang kynshoit shuh shuh ban nang klun bor ha lade.
Hynrei ha kajuh ka por, ki da don pat kiba bym tang ba ki kwah bor, hynrei ba ki donkam ia ka bor ban pynioh ia ka jingangnud jong kiba bun kiba lang. Kum ka nuksa, ka bor synshar khadar jong ka jingsynshar jong ki hima ki sima, jong ki hima syiem, ki hima ki Lyngdoh, ki Hima jong ki Elaka Doloi, hapoh ka Riti Synshar jong ka Ri India hi baroh kawei, ban batai shai ia kine baroh ha ka KYRNIT KABA HYNRIEW jong ka Ri India.
Kane ka long ka Hok jong ka Ri Hynñiewtrep, Hynñiewskum, ka Hynñiaw – Wasa, kaba la dei ban ioh bad pynjari, naduh ba ka Ri India ka la ioh ia la ka jinglaitluid na ka synshar nongwei jong ki Phareng, na shiliang duriaw. Hynrei,kane kam pat urlong haduh kine ki sngi kiba mynta. La shu pyntud da kumne bad da kumtai, da ki sorkar jylla, ki bym shym khia ia kane ka kam kaba kongsan tam.
Ki kyrdan synshar khadar, ki dang naduh ki Dorbar dong, ki Dorbar Shnong, ki Dorbar Raij, ki Dorbar Lyngdoh, ki Dorbar ki Hima, kyrdan pa kyrdan, khnang ban ryntih ka Ri hi baroh kawei.
Kane ka long ruh ka dur synshar khadar kaba kongsan, na ka bynta ban pyntreikam ia ka ban pynroi pynsan lun pyllun, ym tang ka mynta, hynrei kaba haduh ka lashai lashisngi.
