Nongpoh, Rymphang 26:
Ha kawei ka jingjia takhuh kali kaba sngew shyrkhei kaba la jia ha Ri-Bhoi District ha ka Sngi U Blei, 6 ngut ki briew ba kynthup ïa u nongñiah ki la khlad noh ha shen hadien ba ka kali kaba ki shong ka la shah tynrah ha kawei ka trok kit dewbilat kaba don ïa u nombor WB-41-G-7628 mar syn poi ha Sumer ha ka por kumba 2:30 nohphai sngi.
Katkum ki jingtip ba la ïoh lum, la ong ba katei ka trok kaba dang wan na ka thaiñ Ri-lum Jaiñtia ban hiar sha nongbah Guwahati kaba la pynher sted bha, tang mar syn poi ha Sumer ka la leit ban tynrah shuwa ïa u jingker phiah surokbah (Divider) jong ka National Highway 6 bad kynthih sha shiliang surok ban tynrah pat ïa ka kali ‘Bolero’ kaba don ïa u nombor AS-26-B-7908 kaba dang kiew sha ka nongbah Shillong tad haduh ba katei ka kali ka la kylla khongpong bunsien bad dam syndah na ka jingban jong katei ka trok.
Kitei 6 ngut kiba la khlad noh ki dei ki ’riewniam kiba peit ïa kawei ka skul Mission ha Assam bad ki kynthup ïa 3 ngut ki Sister, uwei u Phadar, iwei i nonghikai bad u nongñiah jong katei ka kali.
Namar ka jingjulor kaba jur jong katei ka kali, ka la shim por da ki kynta ïa ki bor pulit bad ki briew ban ïarap sei ïa ki met jong kiba la khlad noh ha katei ka jingjia.
Kitei 6 ngut ki kynthup ïa u Fr. Mathew Das, Parish Priest ka Barama Parish ka Sr. Melagrine Dantes, Sr. Promila Tirkey, Sr. Rossie Nongrum, Mairan (nonghikai) lem bad u nongñiah jong ka kali.
Shuh shuh la ïoh jingtip ba u nongñiah bad nongbud jong katei ka trok ki la mynsaw jur bad la pynkit noh ïa ki sha ki jaka ai jingsumar ha nongbah Shillong bad na ka liang ki bor pulit ki dang pynlong ïa ka jingtohkit halor kane ka jingjia.
