US, Rymphang:
Katkum ki khubor la ong ba uwei u heh spah ba paw nam bha jong ka United States, u Thomas Lee, u la bthat jubor noh ia la ka jingim hapoh ka shlem treikam lajong kaba don ha Mahattan ha ka Sngi Palei. U Lee u la don 78 snem ka rta ha kane ka por ba u la pynkut jubor noh ia la ka jingim.
Ia utei u nongkhaïi ba heh spah jong ka US, la pynbna iap naduh ka por ba la shem ia u ha katei hi ka ophis treikam jong u ha Manhattan ha ka por kumba 11:10 jong katei ka step Sngi Palei. La ong ba ki pulit ki la ioh ia ka phone ‘Emergency’ lyngba jong u nombar 911 ha katei ka step, hynrei la shem ba utei u heh um shym sah mynsiem bad um don shuh naduh ka por ba ki pulit ki dang poi ha katei ka jaka treikam jong u ruh ha katei ka por.
Kumta ki pulit ki la iathuh ba hadien ba la wad ia ka daw ka jingiap jong u, la sngewthuh shai ba dei ka jingsiat hi jong u ialade namar ka met jong u ka don ia ka dak mong kuli. La ong ruh ba dei ka nongbud jong u hi kaba la lap ia u, ba u la kyllon iap hapoh ka kamra sum jong u hadien ba u la jah slem bha bad kumta ka la leit ban wad ia u namar kam shym ioh ktien eiei na u la kumba katto katne por.
Shuh shuh la ong ba ki pulit ki la lap ia u Lee ba u thiah iap hapoh ka kamra sum jong u, ha ryngkat ka dak mong kuli na ki bynta jong ka khlieh jong u.
Ki bahaiing bad paralok jong utei u heh spah, ki la pynpaw ka jingsngewsih kaba jur haba iadei bad ka jingshim rai ba lyngkot jingmut jong utei u heh spah uba ka pyrthei baroh kawei ka tip ia u kum u nongkhaïi uba paw nam bad uba shyrkhei ban ia kiwei pat ki nongkhaïi kiba bun. Hynrei kaba sngew sahnud ka long ba kim tip eiei shaphang ka daw ka jingsiat iap jong u ialade ha katei ka sngi bad ym lah ruh ban tip ia ki jingeh ba u don namar um ju pynpaw na iathuh eiei wat ha ka kurim ne ha ki khun ne ha ka kmie jong u ruh.
Ha ki 46 snem ba la leit, utei u heh spah u dei uba la iadon bynta ha ka jingbei tyngka ia palat $15 billion ki kam khaïi- pateng bad hadien u la kylla long ruh u nongpynmih ia ki jait tiar kiba kham kyrpang bad kiba kham bha kum ka Warner Music bad Snapple Beverages.
