Raipur, Rymphang:
Ki la don kumba lai ngut ki shipai ïada ri kiba la shah pynïap ha ki lehnoh katba arngut kiwei pat ki la mynsaw ha ka por ba la don ka jingïasiat kaba markylliang bad ki lehnoh jong ka kynhun CPI (Maoist) ha Sukma distrik, ka jaka kaba jngai kumba 500 km na ka bynta ba shaphang Shathie jong ka Raipur ha ka sngi Saitjaiñ.
Ki heh shipai ki la ïathuh ba ïa kiba la mynsaw la pynkit mar mar sha ka jaka ai jingsumar kaba don ha katei ka thaiñ ha kaba la ong ba kine ki dang shah sumar haduh mynta bad la ong ba ki la lait na ka jingma bad kham ïoh bor.
Kumba la ïoh jingtip la ong ba ka kynhun District Reserve Guards (DRG) jong ka Sukma ka la mih ban leit sha katei ka jaka hadien ba la ïoh jingtip halor ka jingdon jong ki lehnoh ha katei ka thaiñ.
Katba ka kynhun jong ki shipai ka dang don ha ka lynti na Jagargunda sha ki bynta ba long khlaw jong ka Kunded, ki lehnoh ki la siat pathar khlem sangeh ha kaba na ka liang jong ki shipai ruh ki la pynphai kylla ïa ka jingsiat.
Kumba la ïathuh ka tyllong khubor, la ong ba ka kynhun jong ki shipai ïada ri ka la shah kerkut ha ki lehnoh ha katei ka thaiñ.
Ha kaba ïadei bad ka jingjia la ngeit ba ki la don bun ngut ruh ki lehnoh kiba la shah pynmynsaw ha ka por ba don ka jingïasiat kaba markylliang.
Ki shipai kiba la ïap ha kane ka jingjia ki kynthup ïa u ASI Ramuram Nag bad arngut ki Constable kiba kynthup ïa u Kunjam Joga bad u Ganjam Bheema.
Hadien ba ka la don ka jingïasiat, ka kynhun jong ki shipai ïada ri ka la pynlong ïa ka jingleit thwet lehnoh ha katei ka thaiñ.
Ka Sukma ka la long kawei na ki 7 tylli ki distrik kaba la shah ktah jur ha ki lehnoh kaba don ha ka thaiñ ba shaphang Shathie jong ka Bastar.
