Khliehriat, Rymphang 26:
Haduh 151 tylli ki kynhun pynïaid ilekshon hapoh East Jaiñtia Hills District ki la leit sha la ki jong ki jong ki jaka thep ‘vote’ ba la pynbeit kum shi bynta ban pyntikna ïa ka jingïaid beit ïaid ryntih jong ka ilekshon sha ka ïingdorbar thawaiñ ka ban long mynta ka sngi naduh ka por 7:00 baje mynstep haduh 4:00 baje janmiet.
Ki kynhun jong ka 5-Sutnga Saipung (ST) Assembly Constituency bad ka 6- Khliehriat (ST) Assembly Constituency ryngkat ki Electronic Voting Machines (EVMs), Voters Verifiable Paper Audit Trails (VVPATs) bad kiwei de ki tiar ilekshon ba donkam ki la mih na nongbah Khliehriat mynta ka sngi ban leit sha la ki jong ki jong ki jaka thep ‘vote’.
Lah ruh ban kdew ba napdeng ki 151 kynhun, ki don 11 kynhun kiba la mih lypa naduh ka Sngi Saitjaiñ (25/2/2023), namar ki jaka thep ‘vote’ ba ki dei ban leit ki don sha kyndong eh jong ka distrik.
