Shillong, Rymphang 26:
Ka jingthep vote ban jied ïa ki dkhot ka Ïingdorbar Thawaiñ kaba khatwei ka Jylla kan long ha ka Lah Sngi U Blei ha kaba ki paidbah na ki 59 tylli ki konstitwensi kin leit sha ki 3,419 tylli ki jaka thep vote ban ñion ïa u budam ha ka kor thep vote, katkum ka mon bad jingjied jong ki na ka bynta ban rai ïano kin jied napdeng ki 369 ngut ki kyrtong kiba la mih ban ïakhun ïa ka ilekshon kynthup 36 ngut ki kynthei.
Ka jingthep vote kan sdang ha ka por 7 baje mynstep bad kan kut ha ka por 4 baje janmiet, hapdeng ka jingpahara jur ki pulit bad jingpeitngor ki briew kiba pynïaid ïa ka ilekshon. Ka jingñiew vote kan long ha ka 2 tarik Lber.
Ki don 369 ngut ki kyrtong kynthup 36 ngut ki kynthei kiba ïakhun ïa ka ilekshon, lait noh ha Sohïong konstitwensi, namar ïa ka jingthep vote la pynsangeh hadien ka jingkhlad noh u Myntri Sorkar barim uba long u kyrtong ka United Democratic Party (UDP), u Bah HDR Lyngdoh ha ka 20 tarik Rymphang, 2023.
Ki nongpynïaid ïa ka ilekshon ki la leit sha kylleng ki jaka thep vote na ka bynta ban pynïaid ïa ka jingthep vote naduh ka sngi Saitjaiñ kumjuh ruh ha ka sngi U Blei.
Kiba kham paw khmat napdeng ki kyrtong kiba ïakhun ha kane ka ilekshon ki long u Myntri Rangbah ka Jylla, uba dei ruh u National President ka NPP, Conrad K Sangma; uba ïakhun ban shahjied biang na South Tura konstitwensi, u Lamphang ka Ïingdorbar Thawaiñ, u Bah Metbah Lyngdoh, uba dei u President ka UDP nalor u nongïalam ka liang pyrshah u Dr. Mukul Sangma uba long u nongïalam ka TMC uba dei tang ma u uba ïakhun na 2 tylli ki konstitwensi; kita na Songsak bad Tikrilla konstitwensi, nalor u MP na Shillong u Bah Vincent H Pala uba dei u President ka Congress ha Meghalaya.
Na ki 21,75,236 ngut ki nongthep vote ha ki 60 tylli ki konstitwensi, ki nongthep vote ha ki 59 tylli ki konstitwensi ki don 21,40,453 ngut (lait noh ka Sohïong konstitwensi). Ki don 10,81,342 ki kynthei bad 10,58,929 ngut ki shynrang.
Napdeng kiba bun ki seng saiñ pyrthei kiba pynïeng kyrtong, tang ka Congress bad ka BJP ki pynïeng kyrtong lut ha baroh 60 tylli ki konstitwensi.
U Chief Electoral Officer, Bah F.R Kharkongor u la ong, baroh ki jingpynkhreh la dep lut na ka bynta ka jingthep vote ha ki jaka thep vote ha ki 59 tylli ki konstitwensi ha ryngkat ka jingpynkhlaiñ ïa ki bor pahara. Ki don 119 kynhun ki pulit Central Armed Police Force (CAPF) kiba la mang khnang na ka bynta ban phah pahara ha Meghalaya namar ka jingpynlong ïa ka ilekshon.
