Shillong, Rymphang 26:
Ka MLA barim ka East-Shillong, Dr. M. Ampareen Lyngdoh ka la ujor da ka ejahar halor ka jingsaphriang jong ka ‘message’ ba lamler ha ka rynsan lad pathai ‘WhatsApp’ da ka jingthmu ban pynthut ïa ka ilekshon ka ban wan.
“Nga thoh sha phi ban pyntip ïa kane haba ïadei bad ka dur (screenshot image) kaba la pynsaphriang ha ka rynsan lad pathai ‘WhatsApp’ bad ïa kane kajuh ka dur la buh dak ba la phah pateng bunsien ïa ka (forwarded many times),” la ong ka Dr. M. Ampareen Lyngdoh ha ka ejahar sha u ‘Officer In-Charge’, Laitumkhrah Police Station.
Ka la ong ruh ba katei ka dur ka pyni ïa ka jingïakren kaba lamler ha ka ktien Khasi hapdeng iwei i ’riewshimet i bym lah ban ithuh satia bad ka ‘WhatsApp Account’ ba la pyrthuh bud ne ba la shu kam ba dei ma ka.
Ka la kdew ba katei ka ‘WhatsApp Account’ ha katei ka dur ka la pyndonkam ïa ka dur jong ka kum ka ‘Profile Photograph’ bad la ïadon bynta ha ki jingïakren ba lamler halor ka jingpyndonkam be-aiñ ïa ka pisa na bynta ki ‘vote’ ha kane ka ilekshon ban wan sha ka ïingdorbar thawaiñ ka Jylla.
“Nga kwah ban pynshai hangne ba ym shym la don kano-kano ka jingïakren kaba la jia bad kum ka nongmihkhmat kaba don ïa ka jingkitkhlieh kaba la shah jied lah saw sien kynthih sha ka ïingdorbar, ngam pynshlur ne ngam ïadon bynta ha ka jingpyndonkam ïa ki lynti be-aiñ ban khring ïa kaei ka ban sa jia ha ka ilekshon synshar paidbah,” ka la ong.
Ka Dr. Lyngdoh ka la ong ruh ba ki briew ki bym lah ban ithuh satia kiba donkti ha ka ban shna ïa katei ka dur bad jingïakren ba lamler ki la pyrshang ban pyndonkam bakla bad kane ka long ka bym lah pdiang ha ryngkat ka jingthmu ban pynthut ïa kane ka ilekshon sha ka ïingdorbar thawaiñ.
“Ka jingleh jong kine ki briew ka khring ïa ki kyndon jingpynshitom katkum ka Information Technology Act, 2000 ba kynthup ïa ka kyndon 66D, ki kyndon jong ka Indian Penal Code, 1980, ba kynthup ïa ki kyndon 171 (C), 171 (G), 171 (F), 153A, 499, 500, 505(2); bad ki kyndon jong ka Representation of Peoples Act, 1951 ba kynthup ïa ka kyndon 125,” ka la ong.
Shuh shuh ka la bynrap, “Kine ki kam ki long ka jingpynkheiñ ïa ka aiñ bad ki lah ruh ban ktah ïa ka jingïaid beit ïaid ryntih jong ka ilekshon. Nga kyrpad ban pynshitom ïa kito kiba donkti halor kane ka kam.”
