Bengaluru, Rymphang:
Kiei kiei baroh ki la sdang ban paw pyrthei khamtam ha kaba ïadei bad ka jingïakhun ïa ka ilekshon jong u snem 2024.
Ha kaba ïadei bad kane, na ka liang u Myntri Rangbah jong ka Bihar u Nitish Kumar u la paw ba u la long u nongïakhun ba pyrshah jong u Myntri Rangbahduh u Narendra Modi ha ka ilekshon jong ka Lok Sabha ha u snem ban wan.
U la buh hapoh ka jing-artatien ba un long u nongïakhun na ka liang pyrshah. Kumba la ïathuh ka tyllong khubor kaba ïajan bad u la ong ba u la long lypa u nongïalam jong ka Mahagathbandhan ha Bihar, kynthup ka seng Congress, bad lai tylli ki kynhun left bad ka seng jong u Lalu Yadav ka Rashtriya Janata Dal, nalor ka Janata Dal (United).
Kaba donkam baroh ka long sa tang ka jingaidak na ka kynhun ba ïatreilang bad u, khamtam na ka liang ka seng Congress, na ka bynta ban thaw ka kynhun synrop ha ka ri kynthup kiwei pat ki seng riewlum.
U la ïakynduh ïa ka Sonia Gandhi, hashwa ba u Mallikarjun Kharge un long u President jong ka seng Congress bad ban kyrpad ïa ka ba kan trei shitom katba lah ban pynïatylli ïa ka liang pyrshah.
Ha katei ka por ka la bthah ïa u ba un ap haduh ban da kut ka Bharat Jodo Yatra jong u Rahul Gandhi. Mynta ka Yatra ka la kut, u Nitish u la ai jingmut ïa ka seng Congress ba kan sdang noh da ka jingïakren bad ki seng ka liang pyrshah.
Kumba la ïathuh ka tyllong khubor, la ong ba ka seng Congress ka la thmu ban pynlong ïa ka jingïakynduhlang na ka bynta ban pynïatylli ïa ka liang pyrshah.
U la ong ba u la shah Phone ha kiwei pat ki seng ka liang pyrshah bad ka seng Congress ka la dei ban sdang ïa kane.
