Shillong, Rymphang 27:
Ka jingthep vote ha ki shnong khappud jong ka thaiñ Block-II ha Ri-Bhoi District ka la long kaba ïaid beit ïaid ryntih hapdeng ka jingpahara kaba khlaiñ bha. Ha kane ka sngi ki nongthep vote ruh ki la ïoh ban pyndep ïa la ka kamram hapdeng ka mynsiem kaba suk bad shngaiñ.
Lah ban pynkynmaw ba dang ha ka taïew ba la lah, uwei na ki MLA ka West Karbi Anglong u la byrngem ban nym shah satia ïa ki paidbah ka thaiñ Block-II ba kin leit thep vote sha Meghalaya ha kane ka ilekshon.
Ha kaba ïadei bad kane ka jingbyrngem, na ka liang ki bor pynïaid district ka Ri-Bhoi ki la shimkhia mardor bad ban ïakren ruh bad ki bor pynïaid na Assam ban peit ba kan nym don satia kano kano ka jingpynwit hynrei ba ka jingthep vote kan long kaba ïaid beit.
Halor kane, na ka liang jong u Chief Electoral Officer ka Meghalaya u Bah Frederick Kharkongor, u la ong ba halor ka jingmih khubor ba ka don ka jingbyrngem jong uwei na ki MLA ha khappud ban nym shah thep vote ha ki 6 tylli ki polling station, ka shlem treikam ka la shimkhia ban ïakren halor kane bad lyngba ka jingai jingïatreilang na ka liang ka Assam, la ïohi ba ka jingthep vote ka la long kaba jai jai bad kaba ïaid beit khlem kino kino ki jingpynwit.
“Hadien ba ngi la ïohi ïa kane ka khubor, ngi la kren ïa ki bor pynïaid, ha kaba ki bor pynïaid ka Meghalaya bad Assam ruh ki la shimkhia bad ïatreilang halor kane ban peit ba kan nym don ka jingpyndik ne tuklar ban khanglad ïa ki paidbah ban pyndep ïa ka jingthep vote,” la ong u CEO.
U la pynkynmaw ruh ba na ka liang jong ki heh ka CEC kiba la wan poi sha ka jylla ha u bnai ba la dep, ki la ai ka jingkular ba baroh kito kiba don kyrteng hapoh ka electoral roll ba kin nym duh satia ka lad thep vote bad dei halor kane, ba ki bor pynïaid district na ki ar tylli ki jylla ki la trei shitom ban peit ba kan ïaid beit ka kam.
