Tura, Rymphang 27:
U nongïalam ba hakhliehduh ka National People’s Party (NPP) u Conrad K Sangma uba dei ruh u Myntri Rangbah ka Jylla, hadien ba u la dep ban thep ïa la ka vote ha Walbakgre LP School, South Tura, u la pynpaw ka jingkmen ban ïohi ïa ka jingmih ryntih jong ki paidbah ban leit thep vote bad u kyrmen skhem ba un ïoh biang ka jingjop ha kane ka kynti.
U Conrad haba wan poi ha katei ka jaka thep vote, u la ïeng da u laiñ ryngkat bad ki paidbah ban ap ïa la ka pali ban thep ïa ka vote ha ryngkat lang ka para jong u, ka Agatha Sangma kaba dei ruh ka MP na Tura.
“Nga dap da ka jingkmen ban ïohi ïa ka jingkyrshan jong ki paidbah bad ngi don ka jingkyrmen ba skhem ba ngin sa jop kham bun ki MLA ban ïa kaba ngi la jop ha u snem 2018,” la ong u Conrad haba kren sha ki lad pathai khubor hadien ba la dep ban thep vote.
Haba kylli, u Conrad u la ong, “Ïa mynta ngin nym pat lah ban ong eiei watla ka ‘exit poll’ ne ka jingïathuh lypa katkum ki lad pathai khubor ki la pynmih, ba ngin jop bun bad kumta ïa ka kam ba ïadei bad ka kam thaw sorkar ruh ngin sa ïakren bad ki MLA ki jong ngi hadien ba la pynbna ïa ka risol.”
Shuh shuh haba kylli la kin dang ïatreilang ne em bad ki seng ba ki la ïatreilang ha kane ka sorkar MDA, u Conrad u la ong ba halor kane kin sa ïakren namar ka jingkwah ka long beit na ka bynta ka bit ka biang jong ki paidbah ka jylla. “Hooid ha ka ilekshon na ka liang kine ki seng ki la kawang ktieh halor ka rynsan ïalap ilekshon, ha kaba ma ngi ruh ngi la kawang ktieh ïa ki, bad kane kam dei kaba dang thymmai, hynrei phin lap beit ha man la ki ilekshon,” u la ong.
U Conrad u la ong ba ka seng ka la ïoh bha ïa ka jingkyrshan na u paidbah bad u sngewskhem ban jop biang ha kane ka ilekshon. “Ngi la ïoh bha ïa ka jingkyrshan na baroh ki bynta. Ngi la ïohi ïa ka jingmih bha ki paidbah ban thep vote. Wat ha South Tura constituency, ngim pat ju ïohi kum kane ka jingmih thep vote ha ki snem ba la leit noh. Kane ka dei ka dak kaba bha bad ngi kmen shibun ban ïohi ba ki paidbah ki la ïamih ban thep ïa ki vote jong ki ha kane ka ilekshon,” u la ong.
