Rymphang:
Kumba la buh sngi da ka Election Commission ka ri India, ki paidbah ki la mih ha ka 27 tarik Rymphang, 2023 ban jied katkum ka mon bad jingibit jong ki, ïano napdeng ki 369 ngut ki nongïaleh ilekshon, kiba biang eh ban long ki dkhot ka Ïingdorbar Thawaiñ kaba khatwei jong ka Jylla. Ka jingshongshit ki paidbah ha ki sngi ba dang ïaid ka jingïalap ilekshon ka la nang pynrhem ïa kane ka tamasa synshar paidbah da ka jingkhmih lynti ba kin ïamih ryntih ha ka sngi thep vote ban leit sha la ki jaka thep vote ban pyndep ïa la kajong ka kamram kum ki nongshong shnong. Hynrei lada shim jingkheiñ ïa ka jingwan ki nongthep vote, ki dang don byllai kiba jah ki bym shym leit thep ïa la ka vote.
Ka sngi thep vote ka dei ka sngi kaba kyrpang ha kaba wat ka Sorkar ka la ai shuti khnang na ka bynta ki nongshong shnong ban pyndep ïa la ka kamram, hynrei ki dang don pat kiba shim sting ïa kane bad khlem ñiewkor da kaba pynlut kai ïa ka shisngi ban leit sha kiwei pat ki kam. Don kiba leit shangkai bad don pat kiba leit kai sha wah ban khwai doh. Ka ilekshon ka dei ka tamasa synshar paidbah kaba ju pynlong shisien san snem na ka bynta ban jied ïa ki nongsynshar jong ka Jylla bad ka ri. Lada tang 75 na ka 100 ki poi ki nongthep vote ban leit thep vote, kiba dang jah ki dang bun bha.
Haba ai jingkheiñ, na ka 21,40,453 ngut ki nongthep vote kiba don ha ki 59 tylli ki konstitwensi, ka long 16,05,339 ngut kiba leit thep vote, kaba mut, sa 5,35,114 ngut ki nongthep vote ki dang jah; ki bym shym pyndep ïa la ka kamram ban leit jied ïa ki briew kiba dei ban leit sha Ïingdorbar Thawaiñ. Ka tnat Ilekshon ka la pynlong bun jait bun rukom ki jingpynbyrngia ha ki khyndiat bnai bad ka la pynlut shibun ka pisa na ka bynta ban khring ïa ki paidbah nongthep vote. Nalor kata, ki rynsan pathai jingtip bapher bapher ki la treikam bha katkum ka juk jong ki kor ki bor mynta, ha kaba ki paidbah ki la lah ruh ban ïohi ha YouTube, Facebook, Instagram, WhatsApp bad kiwei kiwei rynsan pathai jingtip ïa ka jingbatai shaphang ka jingjied nongthaw aiñ. Hynrei ka jingjah jong ki nongthep vote ka pyni ba kim shimkhia bad kheiñkor ban pyndonkam ïa la kajong ka hok ha kane ka ri synshar paidbah.
Ka Election Commission ka ri India ka la ju ong ba ym dei ban ieh iwei ruh na ki nongshong shnong kiba la kynjoh 18 snem shaneng ban pynrung kyrteng ha ka thup thep vote. Hynrei, kumno ban khring ïa ki nongthep vote ban leit thep vote ka dei kawei pat ka bynta kaba dang donkam ban pyrkhat thymmai. Ym don kawei ruh ka konstitwensi ha kaba ka jingpoi ki nongthep vote kan long shispah na ka shispah.
Kiwei pat ki jaitbynriew na rithor, ki da shimkhia shisha haduh katta katta khamtam ïa ka sngi ban thep vote, namar ki ñiewkor ïa la kajong ka hok kum ki nongshong shnong. Kum ka nuksa, u nongshong shnong uba na Bihar ne Uttar Pradesh, un pyntikna ba un leit sha shnong ynda la jan dei ka sngi thep vote na ka bynta ban thep vote ïa uno-uno ne kano-kano ka kyrtong kaba u sngew ïahap lane ïa ka seng saiñpyrthei kaba pynïeng kyrtong. Kane ka pyni ba ym tang ba kiwei ki jaitbynriew ki shim jingkitkhlieh, hynrei ki shimkhia ban pyndep ïa kamram kum ki nongshong shnong, namar ki shim ba ka ilekshon ka don ïa ka bynta kaba khraw ha ka jingim jong ki, bad ïa ka lawei jong ki pateng ban wan. Wat lada kiwei ki jah, hynrei kiwei pat kiba kham bun ki nongshong shnong ki la pyndep ïa la ka kamram jong ki namar ki don ka jingkitkhlieh bad jingangnud ban ïoh ïa ki nongsynshar kiba trei na ka bynta ban kyntiew ïa ka Jylla kham shalor ha baroh ki liang.
