Moscow, Rymphang:
U President ka Russia, u Vladimir Putin ha kane ka kynti u la ong ba ka NATO ka iadon kti lang ha ka thma ha Ukraine da kaba buhrieh bad ïeng nadien-nadien bad da kaba pynpoi ia ki tiar thma sha Ukraine. Kumta ruh u la ong ba ki ri jong ka thaiñ West baroh kawei, ki kwah ban pynpait- pynphret ia ka Russia ha kane ka por.
Kumta, ka Russia ka la ong ba baroh kitei ki ri jong ka NATO ki la phah da ki phew billion- dollar ki tiar thma sha Ukraine. Kane hi ka la pyni shai ia ka jingleit iadon kti bad jingai jingkyrshan lang jongki baroh ia ka Ukraine hapdeng ka jingiakhun thma jongka bad ka Russia.
Namarkata ruh u Putin u la ong ba kitei ki ri jong ka NATO ki la iasnoh kti lang ban iakhun bad ai jingkyrshan ia ka jingleh-tam ba la sdang da ka Ukraine. Dei na kane ka daw ruh ba u Putin u la kynnoh ba ki ri jong ka thaiñ West ki kwah ban pynlwet ia ka Russia.
Ia kitei ki kyntien, u Putin u la kren hapoh ka jingialang kaba la pynlong ha Moscow ha ka Sngi Palei jong ka taiew ba lah lah, kaba long ruh ka sngi ba la kynmaw ia ka jingdap shi snem ka jingleit hiar thma jong ka Russia pyrshah ia ka Ukraine.
Ha ka jingiakren bad ki lad pathai khubor, u Putin u la ong ba u la dep tip lypa ba kine baroh kin jia kumne ia ka Russia.
Kumta, u la ong ba katei ka jingleh jong ki ri baroh ka pynlong ia ka Russia ba kan leh kumne kumba long mynta.
