Shillong, Rymphang 27:
Ka jingthep ‘vote’ na bynta ka ilekshon sha ka Ïingdorbar Thawaiñ kaba 11 jong ka Jylla ka la kut noh bad baroh ki kyrtong kiba la ïa aireng ha kane ka kynti ki angnud ban poi sha ka thong jong ka jingjop ha ka sngi ñiew ‘vote’ ka ban sa long ha ka 2 tarik u Lber mynta u snem.
Haba phai sha ki kyrtong na ki seng saiñ pyrthei bapher-bapher kiba ïa aireng na North-Shillong konstitwensi, ki la pynpaw ïa ka jingkyrmen skhem ban poi sha ka thong hadien ba ki la dep ban thep ïa ka ‘vote’ jong ki ha ka Lah Sngi U Blei.
U MLA barim bad kyrtong ka VPP, Bah Adelbert Nongrum haba kren sha ki lad pathai khubor u la ong ba u don ka jingkyrmen skhem ban wanphai biang kum u nongmihkhmat namarba ki paidbah kin sa bishar hi ïa ki kam ba u la leh ha kine ki 5 snem ba la dep na bynta ka roi ka par ha baroh ki liang hapoh konstitwensi.
U la ong ruh ba u tikna ba ki paidbah kin ‘vote’ na bynta ka jingkylla khamtam haba phai sha ka jingbym biang ka synshar-khadar jong ka Sorkar MDA hapoh ka jingïalam ka NPP.
“Ngi la ïohi ïa shibun kiei-kiei hapoh kane ka Sorkar ba mynta la ka long ka jingkhaïi tuh ïa u dewïong, ka jingaiti ïa ka jaka jong ka Jylla sha Assam nalor kiwei-kiwei,” la ong u Bah Nongrum.
Une u kyrtong u la ong ruh ba un ïai bteng ban pynsngew ïa ka mat halor ka bhah thung kam, ka jing-ïa-ka-jia pud hapdeng ka Jylla bad ka Assam lem bad kiwei-kiwei.
Ha kajuh ka por, u kyrtong ka BJP na North-Shillong, Bah M. Kharkrang u la ong ba u kyrmen skhem ban poi sha ka thong naba ki paidbah ki kwah ïa ka jingkylla.
Haba pynsngew ba ka seng kam kheiñ troiñ ïa kano-kano ka seng saiñ pyrthei u la ong, “Ngi la wanrah ïa ka thup treikam (agenda) jong ngi sha u paidbah bad ki la ïohi ba ka BJP ka la pyni ïa kane.”
Ha kawei ka liang, u la pynpaw ïa ka jingsngewsih halor ka jingsaphriang ka jingthoh lamler kaba la kdew ba u la weng noh ïa ka kyrteng jong lajong na ka jinglong kyrtong.
U la ong, “Ka don sa kawei ka jingong ba ka BJP kan ym jop na ki konstitwensi ha Shillong. Ka don ka shithi kaba la phah nangne sha Delhi. La pyndonkam ruh ïa kyrteng jong ka BJP ha baroh 2 tylli kine ki shithi lamler.”
Na ka liang u kyrtong ka NPP, Bah Ransom Sutnga u la ong ba u don ka jingkyrmen skhem ban jop ha kane ka ilekshon.
U la ong ruh ba ki jingkynthoh jong ki seng ’riewlum pyrshah ïa ka NPP ki long kum shi bynta jong ka jingïalap ilekshon.
“Ngam ïohi ba kan don jingmyntoi haba ïadei bad ki jingkynthoh na ka liang ki seng ’riewlum pyrshah ïa ka NPP,” la ong u Bah Sutnga.
U la ban jur ba ka mat kaba hakhmat eh jong u ka long ban pynleit jingmut ïa ki samla khamtam ha ka ïoh kam ïoh jam.
Shuh shuh u kyrtong ka Congress, Bah J.A. Lyngdoh u la bynrap ba ki paidbah ka North-Shillong konstitwensi kin ‘vote’ na bynta ka jingkylla bad u kyrmen ban ïoh ïa ka jingjop.
“Lehse ki nongïalam ki la ieh noh ïa ka seng, hynrei kam mut ba ka Congress baroh kawei ka la jah. Ki nongkyrshan ba shisha ki dang don bad ka seng,” u la ong.
