Shillong, Rymphang 27:
U kyrtong shimet na North-Shillong konstitwensi, Bah Michael Kharsyntiew ha ka Lah Sngi U Blei u la kynnoh ba ka don ka jingsuba sam pisa hakhmat jong ka jaka thep ‘vote’ ha Oakland da ki nongïalam jong kawei ka seng saiñ pyrthei.
Katkum ka jingïathuh u Bah Kharsyntiew, katei ka jingjia ka la jia ha ka por mynsngi hapdeng ki kynta katba dang ïaid ka jingthep ‘vote’.
“Ngi la ïoh pdiang ïa ki ‘phone call’ na kiba bun ki ‘volunteer’ halor ka jingdon jong ki briew kiba la ïalum ha kane ka jaka thep ‘vote’. Mar syn ïohsngew ïa kane, nga la wan sha kane ka jaka, hynrei ngi la sahkut kali namar kata ka jingbun briew,” la ong utei u kyrtong uba la ïadonlang ha katei ka jaka lem bad u khun jong u kyrtong ka VPP na North-Shillong, Bah Adelbert Nongrum ban pynsngew halor kaei kaba la jia.
U la ïathuh ruh ba ki don kumba 200 ngut ki briew kiba la ïalum ha ryngkat ka jingdon jong kawei ka kali kaba la ïeng ha katei ka jaka.
U la ong ba hapoh kata ka kali, don ka President Mahila jong kawei ka seng saiñ pyrthei ha ryngkat u State General Secretary jong kawei pat ka seng saiñ pyrthei watla ym shym la don uwei ruh u pulit pahara ha katei ka jaka.
“Ngi la wan, ngi la beh lut ïa ki briew…ngi la ring dur, hadien kane, la wan mih 2-3 ngut ki pulit na kyndong bad ki ong bym don briew hangne, hynrei haba ngi pyni ïa ka ‘video’ kaba ngi la ringdur, ki ong pynban ba ngi duna briew,” la ong u Bah Kharsyntiew.
Haba kdew ba ka jaka ba ïalum kitei ki briew kam duna ïa ka 200 mitar na ka jaka thep ‘vote’, u la buh jingkylli ba ki ïaleh aïu hakhmat phalor jong katei ka jaka thep ‘vote’ bad ka kali jong kata President Mahila ka wan ïeng leh aïu ha katei ka jaka.
“Haba ngi kylli na uwei u nongpeit pyrman ka ilekshon ba balei kane ka briew ka don hangne watla kam dei na North-Shillong, u la ong pynban ‘yn leh aïu’. Haba la don ka jingkynnoh, ha ka jingshisha ki la dei ban pynsangeh ïa ka kali bad talasi bad lehse ki lah ban lap eiei naba bun ngut ki briew ki ïalum ha kata ka kali,” u la ong.
Na ka liang jong u, u kyrpad ruh na ka tnad pynïaid ilekshon ban pynsangeh noh shuwa ïa ka jingthep ‘vote’ ha katei ka jaka.
Shuh shuh u la bynrap, “Shi kynta ha shuwa, baroh ki ‘volunteer’ jong ki seng saiñ pyrthei ki la shah beh noh nangne bad kane ka long kaba dei…kumba la leh ha kiwei-kiwei ki jaka…ym shah ïeng ïano-ïano lait noh ki ‘volunteer’, ki beh lut ïa baroh, hynrei kumno na bynta 2-3 kynta, ki briew ki la shu ïalum hangne, kumno la shah, kata ruh ym duna ïa ka 200 mitar na ka jaka thep ‘vote’.”
Nalor kane, u la ong, “U DC u la wan bad u la leit noh…u nongpeit pyrman ka ilekshon u la wan bad leit noh, u la ong pynban ‘yn leh aïu’.”
U kyrtong ka VPP na North-Shillong ruh u la wan poi lang ha katei ka jaka hadien katto-katne por.
