Nongpoh, Rymphang 27:
Ka jingthep vote ban jied ïa ki nongmihkhmat sha ka ïingdorbar thawaiñ ka jylla na ki san tylli ki konstwensi ka Ri Bhoi ha ka sngi Nyngkong ka la long kaba ïaid beit ïaid ryntih khlem kano kano ka jingthut lane ka jingkulmar. Ha kane ka sngi la ïohi ba ki paidbah ha kylleng ki polling station jong ki konstitwensi bapher bapher ki la mih naduh dang step phyrngab ban leit ap la ka pali wat lada ka por sdang ka dei naduh ka por 7 baje mynstep.
Kumba la ïoh jingtip na u District Election Officer (DEO) ka Ri Bhoi District, ki don kumba 95 tylli ki polling station kiba la ñiew kum kita kiba don jingma (critical polling station) bad 54 tylli kiba kham don jingma (vulnerable polling station), hynrei wat kine ki jaka ruh ba kynthup lang wat ïa kito kiba don sha ki thaiñ khappud ka Ri Bhoi, ka jingthep vote ka long kaba ïaid beit.
Tad haduh ba la thoh ïa kane ka khubor, la ïoh jingtip lyngba ka Election Commission of India ba ka Nongpoh konstitwensi ka dei kaba lam khmat ha ka jingmih bun eh ki paidbah ban leit thep ïa la ki vote kiba la poi haduh 76.44% bud sa ka Jirang konstitwensi – 75.25%, ka Umroi konstitwensi ha ka kyrdan ba lai – 75.12%, ka Mawhati konstitwensi ha ka kyrdan ba saw – 70.02% bad kaba khatduh eh ka dei ka Umsning konstitwensi ha kaba ka jingmih jong ki paidbah nongthep vote ka long 69.37%.
Ha kane ka sngi la ïoh ruh ban ïakren bad katto katne ki kyrtong na ki seng saiñ pyrthei bapher bapher ba kynthup ïa u kyrtong ka UDP na Nongpoh, u Bah Mayralborn Syiem, u kyrtong ka TMC ka Umroi, u Bah George B Lyngdoh, u kyrtong ka NPP na Jirang konstitwensi, u Bah Sosthenes Sohtun, ka kyrtong ka BJP na Nongpoh, ka Kong Marian Maring lem bad u kyrtong ka HSPDP na Umsning, u Bah Primrose Makdoh, kiba la pynpaw ïa ka jingkyrmen ba kin poi sha ka thong jong ka jingjop lyngba ka jingkyrshan jong ki paidbah.
Wat lada ym pat lah satia ban ïoh jingkheiñ kaba tikna bad ka resol ka ban sa pynbna ha ka 2 tarik u Lber, na ka liang kine ki kyrtong ki la ai khublei kyrpang ïa ki paidbah kiba la mih shakhmat ryntih ban thep ïa la ki vote kiba kordor na bynta ban wanrah ïa ka lawei kaba phyrnai na ka bynta ki khun ki kti, ka thaiñ bad ka jylla hi baroh kawei.
