Shillong, Rymphang:
Ka jingpoi ki nongthep vote ha baroh 59 tylli ki konstitwensi ka long kumba 75 na ka 100 (75%) katkum ka jingkheiñ kaba la ai haduh 5 baje janmiet hadien ba la kut ka jingthep vote ha ka Lah Sngi U Blei.
Ïa kane la ïathuh da u Chief Electoral Officer ka Jylla, u Bah FR Kharkongor haba kren sha ki lad pathai khubor ha ka 7 baje janmiet namar na ka liang ki bor pynïaid ilekshon ki dang ap ban ïoh jingkheiñ lut na baroh 3419 tylli ki jaka thep vote kiba don ha ki 59 tylli ki konstitwensi.
Ki paidbah ki la dep ban ai ïa la ka rai ïano ki ibit ban jied, bad mynta ka bok jong ki kyrtong kiba ïakhun ïa ka ilekshon, ka la don ha synduk hapoh ki kor thep vote; ka ban sa plied pat ha ka 2 tarik Lber kaba dei ka sngi ñiew vote.
U Bah Kharkongor u la ong ba ha ka ilekshon ha u snem 2018, ka jingpoi ki nongthep vote ka long 86.9 na ka 100 (86.9%).
“Ngi la antad ba ka jingpoi thep vote ki paidbah kan kham kiew ynda la dep ïoh jingkheiñ lut kaba tikna na baroh ki jaka thep vote,” la ong u CEO.
Ki don 369 ngut ki kyrtong kynthup 36 ngut ki kynthei kiba ïakhun ïa ka ilekshon, lait noh ha Sohïong konstitwensi, namar la pynsangeh ïa ka jingthep vote hadien ba la khlad noh u Myntri Sorkar barim uba long u kyrtong ka United Democratic Party (UDP), u Bah HDR Lyngdoh ha ka 20 tarik Rymphang, 2023.
Napdeng ki kyrtong kiba kham pawkhmat kiba ïakhun ha kane ka ilekshon ki kynthup ïa u Myntri Rangbah ka Jylla uba dei u National President ka NPP, u Conrad K Sangma; uba ïakhun ban shahjied biang na South Tura konstitwensi, nalor u Lamphang ka Ïingdorbar Thawaiñ, u Bah Metbah Lyngdoh, uba dei u President ka UDP, bad u nongïalam ka liang pyrshah u Dr. Mukul Sangma uba long u nongïalam ka TMC uba dei tang ma u hi uba ïakhun na 2 tylli ki konstitwensi – Songsak bad Tikrikilla konstitwensi, nalor u MP ka Shillong u Bah Vincent H Pala uba dei ruh u President ka Congress ha Meghalaya.
Na ki 21,75,236 ngut ki nongthep vote ha ki 60 tylli ki konstitwensi, ki nongthep vote ha ki 59 tylli ki konstitwensi ki don 21,40,453 ngut (lait noh ka Sohïong konstitwensi). Ki don 10,81,342 ki kynthei bad 10,58,929 ngut ki shynrang.
U CEO u la ïathuh ba ka jingthep vote ka long kaba ïaid beit khlem kino-kino ki jingpynwit bad ka long kaba suk kaba saiñ bad jai-jai, hynrei ki don katto katne ki jingthut jong ki kot thep vote, bad ka jingsuki ki kor thep vote.
Haba kylli, halor ka jingpoi ki nongthep vote ka bym pat da biang, u CEO u la ong ba ki don bun ki daw, kawei lehse namar ki don kiba sah shabar Jylla kiba ym lah ban wan thep namar ym pat lah pyntreikam ïa ka ‘Remote Voting Machine (RVM).’
Hynrei u la ong ba ka jingpoi ki nongthep vote ka dei ban kham kiew ha kane ka ilekshon namar ka Election Commission of India ruh ka la shim ki sienjam kum ka jingailad ïa ki ‘riew tymmen bad kiba don jingduna dkhot met ban thep vote na la ïing khlem da leit sha ki jaka thep vote.
Nangta u la ong ruh ba lada ïanujor ïa ka jingpoi ki nongthep vote ha ki ilekshon kiba pynlong ha ka ri baroh kawei, ka jingpoi ki nongthep vote ha Meghalaya ka dei kaba kham kiew.
“Lada ka jingpoi ki nongthep vote ka long hapoh 60 na ka 100 (60%) ngi kheiñ ba ka long shisha kaba duna, hynrei kumba ka long mynta, ka jingmih ki paidbah ban leit thep vote ka la shu biang, tangba donkam shuh shuh ba baroh ki paidbah kin pyndep ïa la kajong ka kamram kum ki nongshong shnong ha kane ka ri synshar paidbah,” u la ong.
