Nongpoh, Rymphang 27:
Hapdeng ka jingwan taplup u lyoh ba dum bad ka jingïam paid dohnud ki bahaïing hasem jong kito ki mynsiem kiba la khlad noh na ka jingtakhuh kali kaba shyrkhei ba la jia ha Sumer, na ka liang ki bor ba dei khmih jong ka Bongaigoan Dioceses ba kynthup naduh ki Phadar bad Sister ha ryngkat ka jingdon jong ki bahaïng hasem bad ki baieid ba thoiñ jong ki, ki la wan ban shimti noh ïa ka met kaba sah na Civil Hospital Nongpoh ha ka sngi Nyngkong.
Kum ban shu pyntip biang, kine kiba la khlad noh ha ka Sngi U Blei ki dei u Rev. Fr. Mathew Das, Parish Priest ka Barama Parish, ki lai ngut ki Sister ka Fatima Convent, Barama ba kynthup ïa Sr. Milagrine Dantes, Sr. Pramila Tirkey bad Sr. Rossie Nongrum nalor u nonghikai ka St John’s Higher Secondary School, Barama, u Mairan Ranger bad u nongñiah jong ka kali, u Sanjay Swargiary.
Ïa ka met jong kine ki riewniam baroh saw ngut la rah noh sha ka Bongaigoan Diocese na ka bynta ban pyndep ïa ka jinglehniam kaba khatduh lashai ka sngi, kata ka 28 tarik u Rymphang ka ban sdang da ka Mass ha Christ Light of the World Cathedral Church, Bongaigaon. Hadien kane, ïa u (L) Rev. Fr. Mathew Das yn tep donburom ha u lum jingtep ka St Jude’s Prayer Tower, Kajalgaon naduh ka por 2 baje janmiet, katba ïa ka met jong lai ngut ki Sister yn tep ha u lum jingtep jong ka St. Paul’s Pastoral Center, Ranggia naduh ka por 10 baje mynstep.
Shuh shuh la ïoh jingtip ruh ba ïa ka met jong u nonghikai ka skul St John’s Higher Secondary School, u Mairan Ranger la aiti sha ki bahaïing hasem bad rah noh sha Darjeeling ban pyndep ïa ka jinglehniam khatduh katba ïa ka met ba sah jong u nongñiah kali uba la tip kyrteng kum u Sanjay Swargiary la aiti noh sha ki bahaïing hasem ban pyndep ïa ka jinglehniam khatduh ha jaka sah ka jong u ha Bongaigoan.
U Parish Priest ka Nongpoh Parish, u Fr. Peter Syiemlieh uba wan ban synran lang ha kane ka sngi, haba kren sha ki lad pathai khubor u la pynpaw ba kum ki paidbah riewngeit ka Balang Katholik ki dap da ka jingïam briew bad ka jingsngewsih kaba khraw halor katei ka jingjia ka bym shym la poi pyrkhat ba u Blei Un shim noh ïa kitei ki hynriew ngut ki mynsiem briew.
Na ka liang u Fr. Peter Syiem u la pynpaw ruh ïa ka jingsngewnguh kaba khraw ïa baroh kiba la don bynta ban ïarap bad ai mynsiem ban pyntngen halor ka jingduh noh ïa kitei ki mynsiem briew, ba kynthup naduh ki Phadar, ki Sister, ki Doctor bad Nurse ka Nongpoh Civil Hospital, ki nongmihkhmat ka Jirang bad Nongpoh kiba la pynbiang ïa ki kali Ambulance, ki bor pulit ka Ri Bhoi kiba la pyndep sted ïa ka kam bad ruh ïa ki paidbah ka Ri bhoi hi baroh kawei kiba la wan ban ai mynsiem bad ïadon bynta ha kane ka jingjia kaba sngewsih.
Ha kajuh ka por, na ka liang u Fr. Peter Syiemlieh u la phah ruh ïa ka kyrwoh sngewlem sha ki bahaïing hasem jong baroh hynriew ngut kito kiba la khlad noh ba U Blei un ïai don ryngkat bad ki ha kum kane ka por ba sngewsih kthang bad ruh ba un ai ïa ka jingjahthait kaba shi junom ïa kitei ki riewniam jong ka Balang Katholik kiba la duh noh ïa la ka mynsiem ba kordor.
